ဉာဏ်ရည်တု (AI) နည်းပညာတွေနဲ့ အစားထိုးဖို့အတွက် ဝန်ထမ်းတွေကိုအလုပ်ထုတ်ခဲ့ကြတဲ့ ကမ္ဘာ့နာမည်ကြီးကုမ္ပဏီအချို့ဟာ အဲဒီနည်းပညာရဲ့ ကန့်သတ်ချက်တွေကြောင့် လူ့စွမ်းအားဝန်ထမ်းတွေကို ပြန်လည်ခန့်အပ်လာကြပါပြီ။ ဆွီဒင်နိုင်ငံရဲ့ နာမည်ကြီး ဖင်တက်ကုမ္ပဏီတစ်ခုဖြစ်တဲ့ Klarna ဟာ ဖောက်သည်ဝန်ဆောင်မှုတွေမှာ AI ချတ်ဘော့တွေကို အလွန်အမင်း အသုံးပြုခဲ့ပေမယ့် အလုပ်တွေ အများကြီးလွန်ကဲသွားတယ်ဆိုတာကို ဝန်ခံခဲ့ပြီး ၂၀၂၅ ခုနှစ်မှာ လူ့စွမ်းအားဝန်ထမ်းတွေကို ပြန်ပြီးခန့်အပ်ခဲ့ပါတယ်။
ဒါ့အပြင် မော်တော်ယာဉ်ထုတ်လုပ်ရေးကုမ္ပဏီကြီးတစ်ခုဖြစ်တဲ့ ဖို့ဒ် (Ford) ကလည်း အလိုအလျောက် စနစ်တွေ လွတ်သွားတဲ့ အမှားတွေကို ပြင်ဆင်နိုင်ဖို့နဲ့ မော်တော်ယာဉ်ရဲ့ အရည်အသွေးကို မြှင့်တင်ဖို့အတွက် အတွေ့အကြုံရှိတဲ့ အင်ဂျင်နီယာ ၃၅၀ ကျော်ကို ၂၀၂၆ ခုနှစ် ဇွန်လမှာ အသစ်ခန့်အပ်တာနဲ့ ရာထူးတိုးမြှင့်တာတွေ လုပ်ဆောင်ခဲ့ပါတယ်။
ရောဘတ် ဟာ့ဖ် (Robert Half) ရဲ့ လူထုစစ်တမ်းတစ်ခုအရ AI ဒါမှမဟုတ် အလိုအလျောက် စနစ်တွေကြောင့် အလုပ်ဖြတ်တောက်ခံခဲ့ရတဲ့ ကုမ္ပဏီတွေထဲက ငှားရမ်းရေးမန်နေဂျာ ၃၂ ရာခိုင်နှုန်းဟာ အဲဒီရာထူးတွေအတွက် လူတွေကို ပြန်လည်ခန့်အပ်ခဲ့ကြတယ်လို့ သိရပါတယ်။ ဒီဖြစ်ရပ်တွေအရ AI ဟာ လုပ်ငန်းတာဝန်အများအပြားကို လုပ်ကိုင်နိုင်ပေမယ့် ကုမ္ပဏီတွေအတွက် အတွေ့အကြုံ၊ ပြဿနာဖြေရှင်းနိုင်စွမ်းနဲ့ ဆုံးဖြတ်ချက်ချနိုင်စွမ်းရှိတဲ့ လူသားတွေက မရှိမဖြစ် လိုအပ်ဆဲဖြစ်တယ်ဆိုတာကို ဖော်ပြနေပါတယ်။
Ref : Technology Innovation
