ဘယ်လ်ဂျီယံနိုင်ငံ Ghent တက္ကသိုလ်က သုတေသီတွေက ကူးစက်ခံထားရတဲ့ လူ့ကိုယ်ခံအားဆဲလ်တွေထဲက HIV ရဲ့ DNA ကို ဖြတ်တောက်နိုင်တဲ့ မျိုးဗီဇပြုပြင်ခြင်း နည်းလမ်းသစ်တစ်ခုကို တီထွင်လိုက်ပါတယ်။ ဒီနည်းပညာမှာ nanoblades လို့ခေါ်တဲ့ အမှုန်လေးတွေနဲ့ HIV က အဓိကပစ်မှတ်ထားတဲ့ CD4+ ကိုယ်ခံအားဆဲလ်တွေထဲကို CRISPR-Cas9 သယ်ဆောင်သွားဖို့ အသုံးပြုထားတာ ဖြစ်ပါတယ်။ ဆဲလ်တွေထဲရောက်သွားတဲ့အခါ CRISPR က မော်လီကျူးကတ်ကြေးလို လုပ်ဆောင်ပြီး HIV DNA ရဲ့ သီးခြားအစိတ်အပိုင်းတွေကို ဖြတ်တောက်ပေးတာ ဖြစ်ပါတယ်။

ဓာတ်ခွဲခန်းစမ်းသပ်မှုတွေမှာ ဒီနည်းလမ်းက ကူးစက်နိုင်တဲ့ ဗိုင်းရပ်စ်အမှုန်တွေ ထုတ်လုပ်မှုကို လျှော့ချပေးနိုင်တာကို တွေ့ရှိခဲ့ရပါတယ်။ သုတေသီတွေက HIV ကူးစက်ခံထားရတဲ့ လူ့ကိုယ်ခံအားဆဲလ်တွေ ပါဝင်တဲ့ ကြွက်တွေမှာလည်း ဒီကုသမှုကို စမ်းသပ်ခဲ့ပါတယ်။ ကုသမှုခံယူထားတဲ့ ကြွက်တွေရဲ့ သွေးထဲမှာ ဗိုင်းရပ်စ်ပမာဏဟာ ကုသမှုမခံယူထားတဲ့ ကြွက်တွေထက် ပိုနည်းနေတာကို တွေ့ရပါတယ်။ ဒါပေမယ့် ဒီကုသမှုက HIV ကို လုံးဝပျောက်ကင်းအောင်တော့ မလုပ်နိုင်သေးပါဘူး။ ဗိုင်းရပ်စ်ကို ဘေလုံးနဲ့ ရိုးတွင်းခြင်ဆီလို တစ်ရှူးတွေမှာ တွေ့နေရဆဲဖြစ်ပြီး အဲဒီကနေတစ်ဆင့် ပြန်လည်သက်ဝင်လာနိုင်ပါတယ်။

ဒီနည်းလမ်းသစ်ဟာ စမ်းသပ်ဆဲအဆင့်မှာသာ ရှိသေးပြီး HIV နဲ့ နေထိုင်နေသူတွေမှာ စမ်းသပ်ထားတာမျိုး မရှိသေးပါဘူး။ အနာဂတ်မှာ ကုသမှုတစ်ခုဖြစ်လာနိုင်မလားဆိုတာ သိရဖို့အတွက် နောက်ထပ် သုတေသနတွေ အများကြီး လုပ်ဖို့ လိုအပ်နေပါသေးတယ်။ အဲဒီ လေ့လာမှုကို EMBO Molecular Medicine ကနေ ဖော်ပြခဲ့တာ ဖြစ်ပါတယ်။
Ref : Technology Innovation




