ပြင်သစ် အစိုးရက ကားရောင်းပြီး လျှပ်စစ် စက်ဘီး ဝယ်ရင် ယူရို ၄,၀၀၀ ပေးနေ

ပြင်သစ် အစိုးရက ကားရောင်းပြီး လျှပ်စစ် စက်ဘီး ဝယ်ရင် ယူရို ၄,၀၀၀ ပေးကာ ပြည်သူတွေ လောင်စာဆီသုံးကားတွေအစား လျှပ်စစ် ကားတွေ၊ စက်ဘီးတွေ ပိုမို ဝယ်ယူဖို့ စွဲဆောင်နေပါတယ်။ လောင်စာဆီသုံး ကားတွေအစား သဘာဝပတ်ဝန်းကျင်ကို မပျက်ဆီးစေတဲ့ လျှပ်စစ် ကားတွေ၊ စက်ဘီးတွေကို ပိုမို အသုံးပြုဖို့ မက်လုံးပေးတာ ဖြစ်ပါတယ်။

ဝင်ငွေနည်း မိသားစုတွေဟာ ကားတွေကို ရောင်းပြီး လျှပ်စစ် စက်ဘီး ဝယ်ရင် ယူရို ၄,၀၀၀ ရရှိမှာ ဖြစ်ပါတယ်။ ဝင်ငွေမြင့်မားတဲ့ ပြင်သစ် မိသားစုတွေကတော့ အစိုးရရဲ့ ဒီထက်နည်းတဲ့ ဝန်ဆောင်မှုကို ရရှိမှာ ဖြစ်ပါတယ်။

အစိုးရက အခု ဝန်ဆောင်မှုကို အရင်နှစ်က စတင် မိတ်ဆက်ခဲ့ပြီး နယ်သာလန်၊ ဂျာမနီနဲ့ ဒိန်းမတ်တို့လို စက်ဘီး ချစ်သူများတဲ့ နိုင်ငံတွေကို အမှီလိုက်ဖို့ အခုလို ဝန်ဆောင်မှုကို တိုးမြှင့်လိုက်တာ ဖြစ်ပါတယ်။ ပြင်သစ် အစိုးရက ၂၀၂၄ ခုနှစ်မှာ နိုင်ငံရဲ့ ၉ ရာခိုင်နှုန်းကို စက်ဘီး ပြောင်းစီးဖို့ အလိုရှိတယ်လို့ ပြောပါတယ်။ လက်ရှိမှာတော့ ၃ ရာခိုင်နှုန်းပဲ စက်ဘီးစီးနေကြပါတယ်။ နယ်သာလန်မှာတော့ ၂၇ ရာခိုင်နှုန်းက စက်ဘီး စီးကြပါတယ်။

အခု မူဝါဒဟာ လစ်သူရေးနီးယားရဲ့ အောင်မြင်တဲ့ စီမံကိန်းကို အတုခိုးထားတာ ဖြစ်ပြီး လစ်သူရေးနီးယားဟာ လျှပ်စစ် စက်ဘီး၊ Scooter ၊ ဆိုင်ကယ် ဝယ်ယူသူတွေကို ယူရို ၁,၀၀၀ အထိ ပေးနေပါတယ်။

ပြင်သစ် အစိုးရဟာ ပဲရစ်မြို့ ၁ ခုလုံးကို စက်ဘီး စီးနိုင်အောင် ယူရို သန်း ၂၅၀ အသုံးပြုကာ တည်ဆောက်မယ်လို့ ပြောထားပါတယ်။ မြို့တော်ဝန် Anne Hidalgo က လာမယ့် ၅ နှစ်အတွင်း စက်ဘီးစီးလို့ရတဲ့ လမ်းအရှည်ကို ၁၃၀ ကီလိုမီတာ အထိ တိုးချဲ့မယ်လို့ ပြောပါတယ်။

Ref : theverge