ကိုရီးယားနိုင်ငံ ဆိုးလ်မြို့က နာမည်ကျော် ဂျိုဂယေး ဘုန်းတော်ကြီးကျောင်းမှာ နည်းပညာနဲ့ ဘာသာရေးကို ထူးထူးခြားခြား ပေါင်းစပ်လိုက်တဲ့ ပွဲတစ်ခု မေလ ၆ ရက်နေ့က ကျင်းပခဲ့ပါတယ်။ အဲဒါကတော့ GI လို့ အမည်ရတဲ့ လူတူစက်ရုပ် တစ်ရုပ်ကို ဘုန်းကြီး ဝတ်ပေးလိုက်တဲ့ အခမ်းအနားပဲ ဖြစ်ပါတယ်။
အမြင့် ၄ ပေကျော်ရှိတဲ့ အဲဒီရိုဘော့ကို “ဂါဘီ” လို့ ဘွဲ့အမည်ပေးထားပြီး သင်္ကန်းဝတ်ပေးထားတဲ့အပြင် ဦးခေါင်းတုံးထားတဲ့ ပုံစံမျိုးဖြစ်အောင်လည်း ဖန်တီးပေးထားပါတယ်။ ပုံမှန်အားဖြင့် ဗုဒ္ဓဘာသာဝင်အဖြစ် ခံယူရင် လက်မောင်းမှာ အမွှေးတိုင်နဲ့ တို့ပြီး အမှတ်အသားပြုရပေမဲ့ ဂါဘီကတော့ ရိုဘော့ဖြစ်နေတာကြောင့် လက်မောင်းမှာ စတစ်ကာကပ်ပြီး လည်ပင်းမှာ ပုတီးကုံးစွပ်ပေးကာ ဗုဒ္ဓ ဘာသာဝင်အဖြစ် လက်ခံခဲ့တာပါ။
ကိုရီးယား ဗုဒ္ဓဘာသာအဖွဲ့အစည်းကတော့ အခုလို လုပ်ဆောင်တာဟာ ရှေးဟောင်းအစဉ်အလာတွေနဲ့ အနာဂတ်နည်းပညာတွေကြား တသားတည်းဖြစ်မှုကို ပြသချင်တာလို့ ဆိုပါတယ်။ ဗုဒ္ဓနေ့ အထိမ်းအမှတ်အဖြစ် ကျင်းပတဲ့ ဒီပွဲဟာ လူသားတွေတင်မကဘဲ အနာဂတ်ရဲ့ နည်းပညာအသစ်တွေပါ ဘာသာတရားရဲ့ အရိပ်အာဝါသအောက် ရောက်ရှိလာနိုင်တယ်ဆိုတဲ့ စိတ်ဝင်စားစရာ သင်္ကေတတစ်ခုလည်း ဖြစ်ပါတယ်။
Ref : upi
