OpenAI ရဲ့ အနာဂတ်အတွက် Elon Musk နဲ့ Sam Altman တို့ တရားရုံးမှာ တွေ့ပြီ

<p>Elon Musk နဲ့ OpenAI CEO Sam Altman တို့ဟာ ကုမ္ပဏီရဲ့ ရည်မှန်းချက်ပိုင်းဆိုင်ရာ</p>

Elon Musk နဲ့ OpenAI CEO Sam Altman တို့ဟာ ကုမ္ပဏီရဲ့ ရည်မှန်းချက်ပိုင်းဆိုင်ရာ အငြင်းပွားမှုတွေကြောင့် ဒီအပတ်အတွင်း မြောက်ပိုင်းကယ်လီဖိုးနီးယားတရားရုံးမှာ စတင်ရင်ဆိုင်ကြမှာ ဖြစ်ပါတယ်။

Musk က Altman နဲ့ Greg Brockman တို့ဟာ ကုမ္ပဏီကို လူသားမျိုးနွယ်အတွက် အကျိုးပြုမယ့် အကျိုးအမြတ်မယူတဲ့ (nonprofit) အဖွဲ့အစည်းအဖြစ် ထိန်းသိမ်းသွားမယ်လို့ ကတိပေးပြီး သူ့ဆီက ငွေကြေးအထောက်အပံ့တွေ ရယူခဲ့ပေမဲ့ နောက်ပိုင်းမှာ Microsoft ရဲ့ ရင်းနှီးမြှုပ်နှံမှုတွေနဲ့အတူ အကျိုးအမြတ်ယူတဲ့ လုပ်ငန်းအဖြစ် ပြောင်းလဲခဲ့တယ်လို့ စွပ်စွဲထားပါတယ်။

ဒီအမှုမှာ Musk က နစ်နာကြေး ဒေါ်လာ ၁၃၄ ဘီလီယံအထိ တောင်းဆိုထားသလို Altman နဲ့ Brockman တို့ကို ရာထူးကနေ ဖယ်ရှားပေးဖို့ပါ တရားရုံးကို တောင်းဆိုထားတာပါ။

ဒီတရားစီရင်မှုအတွင်းမှာ OpenAI တည်ထောင်စဉ်က လျှို့ဝှက်ချက်တွေ၊ ဒိုင်ယာရီတွေနဲ့ အတွင်းရေးစာတိုတွေ အများအပြား ထွက်ပေါ်လာဖို့ ရှိနေပြီး Sam Altman အပြင် Microsoft CEO Satya Nadella ပါ သက်သေအဖြစ် ထွက်ဆိုရမှာ ဖြစ်ပါတယ်။

လက်ရှိမှာ OpenAI ရဲ့ တန်ဖိုးဟာ ဒေါ်လာ ၈၅၀ ဘီလီယံကျော် ရှိနေပြီး ကုမ္ပဏီကို ရှယ်ယာဈေးကွက်ထဲ တင်ဖို့ ပြင်ဆင်နေချိန်လည်း ဖြစ်ပါတယ်။

တရားရုံးကသာ Musk ဘက်က အနိုင်ပေးခဲ့မယ်ဆိုရင် OpenAI ရဲ့ လက်ရှိခေါင်းဆောင်ပိုင်းနဲ့ လုပ်ငန်းဖွဲ့စည်းပုံတွေဟာ အကြီးအကျယ် ပြောင်းလဲသွားနိုင်ပြီး ဒါဟာ ကမ္ဘာ့ AI ပြိုင်ဆိုင်မှုအပေါ်ကိုပါ ရိုက်ခတ်မှုတွေ ရှိလာနိုင်ပါတယ်။

ဒါပေမဲ့ ဥပဒေပညာရှင်တချို့ကတော့ ဒီအမှုအပေါ် သံသယရှိနေကြပါတယ်။ OpenAI ဟာ ယုံမှတ်အပ်နှံမှု (Trust) တစ်ခုမဟုတ်ဘဲ ကော်ပိုရေးရှင်းတစ်ခုသာ ဖြစ်တဲ့အတွက် ဥပဒေကြောင်းအရ Musk မှာ တရားစွဲဆိုပိုင်ခွင့် (Standing) ရှိမရှိဆိုတာကို ငြင်းခုံနေကြတာပါ။

OpenAI ဘက်ကတော့ ဒီတရားစွဲဆိုမှုဟာ အခြေအမြစ်မရှိဘဲ ပြိုင်ဘက်ကို အနှောင့်အယှက်ပေးချင်တဲ့ မနာလိုမှုသက်သက်သာဖြစ်တယ်လို့ တုံ့ပြန်ထားပါတယ်။

တစ်ဖက်မှာလည်း Musk ရဲ့ ကိုယ်ပိုင် AI ကုမ္ပဏီဖြစ်တဲ့ xAI ဟာလည်း SpaceX နဲ့ ပူးပေါင်းပြီး ရှယ်ယာဈေးကွက်ထဲဝင်ဖို့ ပြင်ဆင်နေတာကြောင့် ဒီအမှုရလဒ်ဟာ နှစ်ဖက်စလုံးအတွက် အလွန်အရေးကြီးနေပါတယ်။

Ref: Technology Review