OpenAI နဲ့ Anthropic ကုမ္ပဏီတွေမှာ အလုပ်လုပ်ခဲ့တဲ့ အသက် ၂၇ နှစ်အရွယ် AI သုတေသီ ဂျေးကော့ ကော့ဆင် (Jacob Coxon) ဟာ AI နယ်ပယ်ကနေ ထွက်ခွာတော့မှာ ဖြစ်ပါတယ်။ အဲဒီ အမေရိကန် ကုမ္ပဏီနှစ်ခုစလုံးဟာ လူသားတွေရဲ့ အသက်အန္တရာယ်ကို လောင်းကြေးထပ်ပြီး ကိုယ့်ကိုယ်ကိုယ် တိုးတက်အောင် လုပ်နိုင်စွမ်းရှိမယ့် စူပါအသိဉာဏ် (Superintelligence) ဉာဏ်ရည်တုနည်းပညာကို အပြိုင်အဆိုင် ဖန်တီးနေကြတာဟာ တာဝန်မဲ့ရာကျတယ်လို့ သူက စွပ်စွဲထားပါတယ်။
Anthropic ရဲ့ လုံခြုံရေးဆိုင်ရာ အမှုဆောင်အရာရှိ အီဗန် ဟူဘင်ဂါ (Evan Hubinger) ကလည်း AI ကြောင့် လူသားတွေ သေဆုံးနိုင်ခြေရှိတယ်ဆိုတာကို ထောက်ခံထားပါတယ်။ Anthropic ကုမ္ပဏီအနေနဲ့ အန္တရာယ်တွေကို မထိန်းချုပ်နိုင်ရင် လုပ်ငန်းစဉ်တွေကို ရပ်တန့်မယ်ဆိုတဲ့ ကတိကဝတ်ကို ဖျက်သိမ်းခဲ့တာဟာ ပြိုင်ဘက်တွေက ဈေးကွက်ကို လွှမ်းမိုးသွားမှာ စိုးရိမ်လို့ ဖြစ်ပါတယ်။ ကော့ဆင်ကတော့ အစိုးရရဲ့ ဝင်ရောက်စွက်ဖက်မှု ဒါမှမဟုတ် ပူးပေါင်းဆောင်ရွက်မှု မရှိဘဲ လူသားတွေထက် သာလွန်တဲ့ AI ကို ဘယ်ကုမ္ပဏီကမှ တာဝန်ယူမှုရှိရှိ ဖန်တီးနိုင်မှာ မဟုတ်ဘူးလို့ ယုံကြည်နေပါတယ်။
အခုလို အခြေအနေတွေကြောင့် နည်းပညာနယ်ပယ်က ဝန်ထမ်း ၁,၀၀၀ ကျော်ဟာ အဆင့်မြင့် AI စနစ်တွေ ဖန်တီးနေတာကို နှေးကွေးသွားအောင် လုပ်ဆောင်ဖို့ အမေရိကန်အစိုးရကို တောင်းဆိုထားကြပါတယ်။ OpenAI ဘက်ကလည်း မော်ဒယ်သစ်တွေ လေ့ကျင့်နေတာကို ဩဂုတ်လမှာ နှစ်ပတ်ကြာ ရပ်နားခဲ့ပြီး ထိန်းချုပ်မှုတွေ တင်းကျပ်ပြီးမှ ပြန်လည်စတင်ခဲ့ပါတယ်။ လက်ရှိမှာ အမေရိကန် နိုင်ငံရေးသမားတွေကလည်း ဖက်ဒရယ် ထိန်းကျောင်းရေးအဖွဲ့ မဖွဲ့စည်းမချင်း AI ဖွံ့ဖြိုးတိုးတက်မှုတွေကို ရပ်ဆိုင်းထားဖို့ ဥပဒေကြမ်းတစ်ရပ်ကို တင်သွင်းထားပါတယ်။
Ref : bangkokpost
