TikTok ရဲ့ မိခင်ကုမ္ပဏီဖြစ်တဲ့ ByteDance ရဲ့ ရှယ်ယာတန်ဖိုးတွေ ထိုးတက်လာတာနဲ့အတူ AI နည်းပညာပိုင်းမှာပါ အောင်မြင်မှုတွေ ဆက်တိုက်ရလာတာကြောင့် တည်ထောင်သူ ရှန်ယီမင်း (Zhang Yiming) ဟာ အိန္ဒိယသူဌေးကြီး မူကတ်ရှ်အမ်ဘာနီ (Mukesh Ambani) ကို ကျော်တက်ပြီး အာရှရဲ့ ဒုတိယမြောက် အချမ်းသာဆုံးပုဂ္ဂိုလ် ဖြစ်လာပါတယ်။ ဘလွန်းဘတ် ဘီလျံနာစာရင်း (Bloomberg Billionaires Index) အရ ရှန်ယီမင်းရဲ့ ဓနပစ္စည်းပိုင်ဆိုင်မှုဟာ အမေရိကန်ဒေါ်လာ ၉၂ ဒသမ ၈ ဘီလီယံအထိ ရှိလာပြီး တရုတ်နိုင်ငံရဲ့ အချမ်းသာဆုံးပုဂ္ဂိုလ်အဖြစ် နေရာကိုပါ ခိုင်ခိုင်မာမာ ဗိုလ်စွဲထားနိုင်ခဲ့ပါတယ်။ ကမ္ဘာကျော် TikTok အပြင် တရုတ်နိုင်ငံမှာ အသုံးပြုသူ သန်း ၃၀၀ ကျော်နဲ့ လူကြိုက်အများဆုံး ဖြစ်နေတဲ့ Doubao AI chatbot ရဲ့ အောင်မြင်မှုတွေကြောင့် သူ့ရဲ့ချမ်းသာကြွယ်ဝမှုဟာ လွန်ခဲ့တဲ့ ၇ နှစ်ကထက်စာရင် ၇ ဆမက ချက်ချင်းခုန်တက်သွားခဲ့တာ ဖြစ်ပါတယ်။
အမေရိကန်လွှတ်တော်က နိုင်ငံတွင်းမှာ TikTok ကို ပိတ်ပစ်ဖို့အထိ ဖိအားပေးခဲ့လို့ ကုမ္ပဏီတန်ဖိုးအပေါ် စွန့်စားရမှု ရာခိုင်နှုန်းတွေ လျှော့ချတွက်ချက်ခံခဲ့ရဖူးပေမယ့် အခုအခါမှာတော့ အမေရိကန်လုပ်ငန်းခွဲအချို့ကို Oracle အပါအဝင် နိုင်ငံတကာ ရင်းနှီးမြှုပ်နှံသူအဖွဲ့ဆီ လွှဲပြောင်းရောင်းချမှု အောင်မြင်စွာ ပြီးဆုံးသွားခဲ့ပြီ ဖြစ်ပါတယ်။ အဲဒီလို အမေရိကန်ရဲ့ နိုင်ငံရေးပိတ်ဆို့မှု မရေရာမှုတွေကို ရှင်းထုတ်နိုင်ခဲ့တာကြောင့် ဘာပူပန်မှုမှမရှိတော့တဲ့ BlackRock ကဲ့သို့ ကမ္ဘာ့ထိပ်သီး ရင်းနှီးမြှုပ်နှံသူတွေရဲ့ ကုမ္ပဏီတန်ဖိုး သတ်မှတ်ချက်အသစ်တွေအရ ရှန်ယီမင်းရဲ့ အသားတင်ပိုင်ဆိုင်မှုဟာ ဒေါ်လာ ၂၄ ဘီလီယံကျော် ချက်ချင်းတိုးပွားလာခဲ့တာ ဖြစ်ပါတယ်။ တစ်ချိန်တည်းမှာပဲ အိန္ဒိယဘီလျံနာကြီး မူကတ်ရှ်အမ်ဘာနီကတော့ ဒေါ်လာ ၈၆ ဒသမ ၉ ဘီလီယံနဲ့ အာရှတတိယနေရာကို လျှောကျသွားခဲ့ပြီး ဂေါတမ်အဒါနီ (Gautam Adani) ကတော့ ဒေါ်လာ ၁၁၇ ဒသမ ၄ ဘီလီယံနဲ့ အာရှရဲ့ အချမ်းသာဆုံးနေရာမှာ ဆက်ပြီး ဘုရင်ခံနေဆဲ ဖြစ်ပါတယ်။
အခုဆိုရင် ဘေဂျင်းအခြေစိုက် ရှန်ယီမင်းရဲ့ ByteDance ကုမ္ပဏီဟာ ကမ္ဘာ့ AI စျေးကွက်ကို မုန်တိုင်းဆင်ဖို့နဲ့ အမေရိကန်ရဲ့ နည်းပညာဘီလူးကြီးတွေကို စိန်ခေါ်ဖို့အတွက် အကြီးအကျယ် ပြင်ဆင်နေပါတယ်။ တရုတ် AI စျေးကွက်မှာ ထိပ်ဆုံးကနေ အပိုင်စီးနိုင်ဖို့ ဒီနှစ်ထဲမှာတင် ဒေါ်လာ ၇၀ ဘီလီယံအထိ သုံးစွဲသွားဖို့ စီစဉ်နေပြီး အဲဒီရင်းနှီးမြှုပ်နှံမှု အများစုကို ပြီးခဲ့တဲ့နှစ်က ရှာဖွေပေးခဲ့တဲ့ အမြတ်ငွေ ဒေါ်လာ ၅၀ ဘီလီယံကနေ စိုက်ထုတ်သုံးစွဲသွားမှာ ဖြစ်ပါတယ်။ ကုမ္ပဏီရဲ့ အခြေခံကောင်းမွန်မှုတွေကြောင့် အခုလို ရှယ်ယာတန်ဖိုးတွေ အရှိန်အဟုန်နဲ့ ပြန်တက်လာတာဖြစ်ပြီး အွန်လိုင်းဝန်ဆောင်မှုတွေကို ပိုက်ဆံမပေးချင်ကြတဲ့ တရုတ်နိုင်ငံမှာ Doubao အက်ပ်ကနေ လစဉ်ကြေးကောက်ခံဖို့အထိပါ ပြင်ဆင်နေတဲ့အတွက် ကုမ္ပဏီကို စတော့စျေးကွက်ထဲ အများပိုင်အဖြစ် ပထမဆုံးအကြိမ် ရောင်းချမယ့် (IPO) ပွဲကြီးကလည်း ကမ္ဘာ့စီးပွားရေးလောကမှာ စိတ်လှုပ်ရှားစရာ အကောင်းဆုံးအဖြစ် စောင့်ကြည့်ခံနေရပါတယ်။
Ref : Yahoo
