စမတ်ဖုန်းလောကကို ထပ်မံလှုပ်ခတ်သွားစေမယ့် ခေါက်ဖုန်းအသစ် Huawei Mate XT 2 Ultimate Design ကို တရုတ်နိုင်ငံမှာ တရားဝင် မိတ်ဆက်လိုက်ပါတယ်။
ဒီဖုန်းမှာ အရင်ကထက် ပိုမိုဆန်းသစ်တဲ့ အတွင်းဘက်ခေါက် ပတ္တာစနစ်ကို အသုံးပြုထားပြီး ဘေးလူတွေ ဝင်မကြည့်နိုင်အောင် ကာကွယ်ပေးတဲ့ privacy display မျက်နှာပြင်လည်း ပါဝင်ပါတယ်။
အပြင်ဘက်မှာ ၆ ဒသမ ၅ လက်မရှိတဲ့ တောက်ပတဲ့ Full HD+ OLED မျက်နှာပြင် ပါဝင်ပြီး ဖုန်းကို ဖြန့်လိုက်ရင်တော့ ၁၀ ဒသမ ၂ လက်မအရွယ် 3K OLED မျက်နှာပြင်ကြီးနဲ့ တကယ့်ကို အမိုက်စား ရုပ်ထွက်ခံစားမှုကို ပေးစွမ်းနိုင်မှာ ဖြစ်ပါတယ်။
စွမ်းဆောင်ရည်ပိုင်းမှာလည်း လုံးဝ အလျှော့ပေးမထားပါဘူး။ အသစ်စက်စက် Kirin 9050 Pro ချစ်ပ်ဆက်ကို အသုံးပြုထားလို့ အရင်မော်ဒယ်တွေထက် ၄၂ ရာခိုင်နှုန်းအထိ ပိုမိုမြန်ဆန်လာသလို HarmonyOS 7 နဲ့ အချိတ်အဆက်မိမိ ချောမွေ့စွာ အလုပ်လုပ်ပေးမှာပါ။
ဓာတ်ပုံဝါသနာရှင်တွေအတွက် ကျောဘက်မှာ 50MP ပင်မကင်မရာ၊ အဝေးကို ကြည်လင်ပြတ်သားစွာ ဆွဲရိုက်နိုင်တဲ့ 3.5x optical zoom ပါတဲ့ 50MP telephoto ကင်မရာနဲ့ 40MP ultrawide ကင်မရာတို့ကို စုစည်းတပ်ဆင်ထားပါတယ်။ ဒါ့အပြင် ဆယ်လ်ဖီလှလှလေးတွေ ရိုက်ဖို့ 8MP ကင်မရာကိုလည်း ထည့်သွင်းပေးထားပါတယ်။
ဒီလို စွမ်းဆောင်ရည်မြင့် ဖုန်းတစ်လုံးအတွက် ဘက်ထရီကလည်း အရေးကြီးပါတယ်။ ဒါကြောင့် 5,600mAh ဘက်ထရီကြီးကို တပ်ဆင်ထားပြီး 66W ကြိုးတပ်အားသွင်းစနစ်နဲ့ 50W ကြိုးမဲ့အားသွင်းစနစ်တွေက အချိန်တိုအတွင်း အားအပြည့်သွင်းပေးနိုင်မှာပါ။
ရေနဲ့ဖုန်ဒဏ်ကို အလွယ်တကူ ခံနိုင်ရည်ရှိအောင် IP58/IP59 အဆင့် သတ်မှတ်ချက် ပါဝင်တဲ့အပြင် အပြင်ဘက်မျက်နှာပြင်ကို ပိုမိုခိုင်ခံ့တဲ့ basalt မှန်နဲ့ ဖုံးအုပ်ကာကွယ်ထားပါတယ်။
ဖုန်းကို အပြည့်ဖြန့်လိုက်ရင် အထူ ၃ ဒသမ ၅ မီလီမီတာပဲ ရှိလို့ တကယ့်ကို ပါးလွှာသပ်ရပ်ပြီး ဘေးဘက်မှာ လက်ဗွေရာဖတ်စနစ်နဲ့ နှလုံးခုန်နှုန်း (ECG) တိုင်းတာနိုင်တဲ့ ခလုတ်တွေလည်း ပါဝင်ပါတယ်။
အဲဒီ ဆန်းသစ်တီထွင်မှုတွေ အပြည့်ပါဝင်တဲ့ ဖုန်းကို အနက်၊ ခရမ်းနဲ့ အဖြူရောင်ဆိုပြီး ဆွဲဆောင်မှုရှိတဲ့ အရောင် ၃ မျိုးနဲ့ ရွေးချယ်ဝယ်ယူနိုင်ပါတယ်။ မန်မိုရီပိုင်းမှာလည်း 16GB RAM နဲ့ 2TB storage အထိ အမြင့်ဆုံး ရရှိနိုင်မှာပါ။
ဈေးနှုန်းတွေကတော့ 16GB/256GB အခြေခံမော်ဒယ်ကို တရုတ်ယွမ် ၁၉,၉၉၉ (ခန့်မှန်းခြေ ကန်ဒေါ်လာ ၂,၉၈၀) ကနေ စတင်ပြီး M-Pen 3 စတိုင်လပ်စ် ပါဝင်တဲ့ 16GB/2TB အထူးမော်ဒယ်ကိုတော့ ယွမ် ၂၉,၉၉၉ (ကန်ဒေါ်လာ ၄,၄၇၀) သတ်မှတ်ထားပါတယ်။
Ref: gsmarena
