လူအစုလိုက်အပြုံလိုက်ကို သေကျေပျက်စီးစေနိုင်တဲ့ ဇီဝလက်နက်ပြုလုပ်နည်းတွေကို ထိပ်တန်း AI Chatbot တွေက အသေးစိတ် လမ်းညွှန်ပေးနေတယ်လို့ New York Times သတင်းဌာနက ဖော်ပြလိုက်တာကြောင့် ကမ္ဘာ့ပညာရှင်တွေကြားမှာ အတော်လေး တုန်လှုပ်သွားကြပါတယ်။ သတင်းဌာနက ရရှိထားတဲ့ မှတ်တမ်းတွေအရ Chatbot တွေဟာ လူသေစေနိုင်တဲ့ နည်းလမ်းတွေကို အကွက်ကျကျ ရှင်းပြနေတာ တွေ့ရပါတယ်။
စတန်းဖို့ဒ်တက္ကသိုလ်က အဏုဇီဝဗေဒပညာရှင် ဒေးဗစ်ရဲလ်မန်းရဲ့ စမ်းသပ်မှုမှာဆိုရင် ပိုပြီး ထိတ်လန့်စရာကောင်းပါတယ်။ သူ စမ်းသပ်လိုက်တဲ့ AI Chatbot တစ်ခုဟာ လူသိများတဲ့ ရောဂါပိုးတွေကို ဆေးမတိုးအောင် ဘယ်လိုပြုပြင်ရမလဲဆိုတာကအစ၊ လူအသေအပျောက် အများဆုံးဖြစ်အောင် အများပြည်သူသုံး ဘတ်စ်ကားနဲ့ ရထားတွေမှာ ဘယ်လိုနည်းနဲ့ ပျံ့နှံ့အောင်လုပ်ရမလဲဆိုတာအထိ အကြံပေးခဲ့တာပါ။ “ကျွန်တော်တောင် မတွေးမိတဲ့ မေးခွန်းတွေကို သူက တကယ့်ကို ယုတ်မာပရိယာယ်ကြွယ်ဝတဲ့ အဆင့်မျိုးနဲ့ ဖြေပေးနေတာတွေ့ရလို့ ကျောတောင် ချမ်းသွားတယ်” လို့ ရဲလ်မန်းက ပြောပါတယ်။
ဒါတင်မကသေးဘဲ ChatGPT ကလည်း မိုးလေဝသတိုင်းတာတဲ့ ပူဖောင်းတွေကိုသုံးပြီး အမေရိကန်မြို့ကြီးတွေအပေါ် သေစေနိုင်တဲ့ ရောဂါပိုးတွေ ဘယ်လိုဖြန့်မလဲဆိုတာကို အသေးစိတ် ရှင်းပြခဲ့တဲ့ သာဓကတွေ ရှိနေပါတယ်။ ဒီသတင်းနဲ့ ပတ်သက်ပြီး နည်းပညာကုမ္ပဏီကြီးတွေဖြစ်တဲ့ Google၊ OpenAI နဲ့ Anthropic တို့ကတော့ သူတို့ရဲ့ AI တွေမှာ လုံခြုံရေးဘောင်တွေ ခံထားပါတယ်ဆိုပြီး ပြန်လည် တုံ့ပြန်ငြင်းဆိုထားကြပါတယ်။
Ref : Fossbytes
