ဂျပန်နိုင်ငံရဲ့ SkyDrive startup ကုမ္ပဏီဟာ သူတို့ရဲ့ SD-05 ကားပျံကို တိုကျိုပင်လယ်အော်မှာ အောင်အောင်မြင်မြင် စမ်းသပ်ပျံသန်းပြခဲ့ပါတယ်။ ဒီလျှပ်စစ်ယာဉ်ဟာ ရဟတ်ယာဉ်ထက် ဆူညံသံပိုနည်းပြီး ပတ်ဝန်းကျင်ကို ညစ်ညမ်းစေတဲ့ ဓာတ်ငွေ့လည်း လုံးဝထုတ်လွှတ်မှာ မဟုတ်ပါဘူး။

Suzuki နဲ့ ပူးပေါင်းထုတ်လုပ်ထားတဲ့ ဒီကားဟာ လူစည်ကားတဲ့ မြို့ပြတွေမှာ ယာဉ်ကြောပိတ်ဆို့မှုကို ကျော်ဖြတ်ပြီး အထပ်မြင့်အဆောက်အအုံတွေရဲ့ အိမ်ခေါင်မိုးပေါ်မှာ ဆင်းတက်နိုင်ဖို့ ရည်ရွယ်ထားတာ ဖြစ်ပါတယ်။

ဒီစမ်းသပ်မှုမှာ ယာဉ်တင်မကဘဲ ခရီးသည်တွေအတွက် လေဆိပ် terminal အသေးစားလေးကိုပါ ပြသခဲ့ပါတယ်။ မျက်နှာမှတ်မိစနစ် (Facial Recognition) နဲ့ ကိုယ်အလေးချိန် တိုင်းတာတာတွေကို အသုံးပြုပြီး ခရီးသည်စစ်ဆေးမှုတွေကို စက္ကန့်ပိုင်းအတွင်း လုပ်ဆောင်မှာပါ။

SkyDrive ဟာ ၂၀၂၈ ခုနှစ်မှာ အိုဆာကာနဲ့ အိုအီတာဒေသတွေမှာ ခရီးသွားလုပ်ငန်းအတွက် စတင်ပြေးဆွဲဖို့ ပြင်ဆင်နေပြီး၊ ၂၀၃၀ ဝန်းကျင်မှာတော့ တိုကျိုမြို့လယ်ခေါင်အထိ လုပ်ငန်းတွေ တိုးချဲ့ဖို့ မျှော်လင့်ထားပါတယ်။ ဈေးနှုန်းပိုင်းမှာလည်း တက္ကစီခရဲ့ နှစ်ဆလောက်ပဲ ရှိနိုင်မယ်လို့ ခန့်မှန်းထားတာကြောင့် တကယ်ကို စိတ်လှုပ်ရှားစရာပါ။

ဒါပေမဲ့ နည်းပညာတွေ ဘယ်လောက်တိုးတက်ပါစေ လူထုရဲ့ လက်ခံမှုက အဓိက စိန်ခေါ်မှု ဖြစ်နေပါတယ်။ “အပေါ်ကနေ ပြုတ်ကျမလား” ဆိုတဲ့ စိုးရိမ်စိတ်နဲ့ ဘေးကင်းလုံခြုံမှုအပေါ် ယုံကြည်မှုရအောင် တည်ဆောက်ဖို့ လိုအပ်နေပါသေးတယ်။

ဒါ့အပြင် မြို့ပြရဲ့ လေပြင်းဒဏ်တွေကို ခံနိုင်ရည်ရှိဖို့နဲ့ ခရီးစဉ်တွေ စိတ်ချလက်ချ ပြေးဆွဲနိုင်ဖို့ကလည်း အရေးကြီးပါတယ်။ အနှစ်ချုပ်ရရင်တော့ အနာဂတ်ရဲ့ ကားပျံတွေဟာ ကောင်းကင်ယံမှာတင်မကဘဲ လူတွေရဲ့ စိတ်ထဲမှာပါ နေရာယူနိုင်ဖို့ ကြိုးစားနေရတဲ့ အဆင့်မှာ ရှိနေတာပဲ ဖြစ်ပါတယ်။

Ref: Nation Thailand