Ferrari ကုမ္ပဏီဟာ Milan Design Week မှာ ပေ ၁၀၀ အရှည်ရှိတဲ့ Hypersail အမျိုးအစား ရွက်လှေသစ်ကြီးကို ထုတ်ဖော်ပြသလိုက်ပြီး နည်းပညာလောကကို အံ့အားသင့်စေခဲ့ပါတယ်။ ဒီရွက်လှေကို ၂၀၂၆ ခုနှစ်မှာ စတင်မိတ်ဆက်မှာဖြစ်ပြီး ပင်လယ်ပြင်စမ်းသပ်မှုတွေကိုတော့ အဲဒီနောက်ပိုင်းမှာ လုပ်ဆောင်သွားဖို့ ရှိနေပါတယ်။ အထူးခြားဆုံးကတော့ Ferrari လို့ ပြောလိုက်ရင် ပြေးမြင်လေ့ရှိတဲ့ အနီရောင်အစား တောက်ပတဲ့ Giallo Fly အဝါရောင်ကို သုံးထားတာပဲ ဖြစ်ပါတယ်။
ဒီရွက်လှေဟာ ပင်လယ်ပြင်ပြိုင်ပွဲတွေအတွက် သီးသန့်ရည်ရွယ်ထားတာဖြစ်ပြီး ရေပေါ်မှာ ကြွတက်ပြီး ပျံသန်းသလို မောင်းနှင်နိုင်တဲ့ T-foils စနစ်တွေနဲ့ တည်ဆောက်ထားပါတယ်။ အကျယ် ၂၀ မီတာရှိတဲ့ ကာဗွန်ကိုယ်ထည်နဲ့ မီတာ ၄၀ မြင့်တဲ့ ရွက်တိုင်တွေက ဒီရွက်လှေရဲ့ စွမ်းဆောင်ရည်ကို အကောင်းဆုံး ဖြစ်စေမှာပါ။ ဒါ့အပြင် Guillaume Verdier လို ထိပ်တန်းဒီဇိုင်နာနဲ့ ပူးပေါင်းဖန်တီးထားတာကြောင့် နည်းပညာနဲ့ အလှအပ ပေါင်းစပ်ထားတဲ့ ပြိုင်ဘက်ကင်း လက်ရာတစ်ခုလို့လည်း ဆိုနိုင်ပါတယ်။
စွမ်းအင်ပိုင်းမှာလည်း စက်သုံးဆီသုံးအင်ဂျင်ကို လုံးဝမသုံးဘဲ ဆိုလာပြား စတုရန်းမီတာ ၁၀၀ ကနေ ထွက်လာတဲ့ ၂၀ ကီလိုဝပ် စွမ်းအင်ကိုပဲ အသုံးပြုထားပါတယ်။ လေစွမ်းအင်နဲ့ ရွေ့လျားစွမ်းအင် (Kinetic Energy) တွေကိုပါ ပေါင်းစပ်အသုံးချထားတာကြောင့် သဘာဝပတ်ဝန်းကျင်ကို မထိခိုက်စေတဲ့ အနာဂတ်နည်းပညာတစ်ခုလို့ ပြောလို့ရပါတယ်။ Ferrari ကားတွေမှာ သုံးတဲ့ အဆင့်မြင့်ထိန်းချုပ်မှုစနစ်တွေကို ဒီရွက်လှေမှာ ပြန်လည်အသုံးချထားပြီး ဒါဟာ အနာဂတ်ရဲ့ ဆန်းသစ်တီထွင်မှုတွေအတွက် စမ်းသပ်ချက်တစ်ခုလည်း ဖြစ်ပါတယ်။
Ref : Fossbytes
