အနာဂတ်မှာ လူသားတွေ အာကာသထဲအထိ နယ်မြေချဲ့ထွင် နေထိုင်လာကြတဲ့အခါ မျိုးပွားမှုဖြစ်စဉ်က ဘယ်လိုဖြစ်လာမလဲဆိုတာကို သိပ္ပံနည်းကျ စူးစမ်းဖို့အတွက် တရုတ်နိုင်ငံက ထူးခြားတဲ့ စမ်းသပ်မှုတစ်ခု လုပ်ဆောင်လိုက်ပါတယ်။ အဲဒါကတော့ ဓာတ်ခွဲခန်းထဲမှာ ဖန်တီးထားတဲ့ လူသားသန္ဓေသားမော်ဒယ်တွေကို သူတို့ရဲ့ တီယန်ဂေါင်အာကာသစခန်းဆီ စေလွှတ်လိုက်တာပဲ ဖြစ်ပါတယ်။
ဒါပေမဲ့ စိုးရိမ်စရာတော့ မဟုတ်ပါဘူး။ ဒီအရာတွေက ဖခင်ရဲ့သုက်ပိုးနဲ့ မိခင်ရဲ့သားဥ ပေါင်းစပ်ပြီး ဖြစ်လာတဲ့ သန္ဓေသားစစ်စစ်တွေ မဟုတ်ဘဲ၊ သန္ဓေသားရဲ့ အစောပိုင်းကြီးထွားမှုကို အတုယူထားတဲ့ ပင်စည်ဆဲလ် (stem cell) အခြေခံ မော်ဒယ်တွေသာ ဖြစ်လို့ လူသားကလေးငယ်တစ်ဦးအဖြစ် ကြီးထွားလာနိုင်စွမ်းတော့ မရှိပါဘူး။
ဒီသန္ဓေသားမော်ဒယ်တွေကို တီယန်ကျိုး-၁၀ (Tianzhou-10) ကုန်တင်အာကာသယာဉ်နဲ့ အာကာသထဲကို သယ်ဆောင်သွားခဲ့တာ ဖြစ်ပါတယ်။ သိပ္ပံပညာရှင်တွေရဲ့ အဓိကရည်ရွယ်ချက်ကတော့ အာကာသထဲက မြေဆွဲအားမဲ့ အခြေအနေနဲ့ အာကာသရောင်ခြည်တွေက သက်ရှိတွေရဲ့ အစောပိုင်း ဆဲလ်ဖွဲ့စည်းမှုတွေအပေါ် ဘယ်လိုသက်ရောက်မှု ရှိမလဲဆိုတာကို လေ့လာဖို့ပဲ ဖြစ်ပါတယ်။
အထူးသဖြင့် ခန္ဓာကိုယ်ရဲ့ အခြေခံပုံစံ ဖြစ်ပေါ်လာဖို့ အရေးပါတဲ့ သန္ဓေသားက သားအိမ်နံရံမှာ တွဲကပ်တဲ့ဖြစ်စဉ် (implantation) နဲ့ ဆဲလ်တွေ အလွှာလိုက် ဖွဲ့စည်းတဲ့ဖြစ်စဉ် (gastrulation) တွေ အာကာသထဲမှာ ဘယ်လိုပြောင်းလဲမလဲဆိုတာကို အနီးကပ် စောင့်ကြည့်တာ ဖြစ်ပါတယ်။
အဲဒီမော်ဒယ်တွေဟာ အာကာသထဲမှာ ၅ ရက်ခန့် ကြာမြင့်ခဲ့ပြီး အဲဒီအတောအတွင်းမှာ စက်ရုပ်အလိုအလျောက်စနစ်နဲ့ အစာကျွေးတာတွေ လုပ်ဆောင်ခဲ့ပါတယ်။ အဲဒီနောက်မှာတော့ ဆဲလ်တွေကို အေးခဲစေပြီး ကမ္ဘာမြေပေါ်က ဓာတ်ခွဲခန်းဆီ ပြန်လည်ပေးပို့ကာ သုတေသနအသေးစိတ် ပြန်လည်ဆန်းစစ်နေတာ ဖြစ်ပါတယ်။
အချို့သတင်းတွေအရ ဒီလူသားဆဲလ်မော်ဒယ်တွေအပြင် ငါးနဲ့ ကြွက်တွေရဲ့ သန္ဓေသားနမူနာတွေကိုလည်း ထည့်သွင်းစမ်းသပ်ခဲ့တယ်လို့ သိရပါတယ်။ လိုရင်းကိုပြောရရင် တရုတ်နိုင်ငံဟာ အာကာသထဲမှာ လူသားတွေရဲ့ အစောပိုင်း သန္ဓေတည်မှုဖြစ်စဉ် ဘယ်လိုဖြစ်ပျက်မလဲဆိုတာကို ပထမဆုံး ခြေလှမ်းအဖြစ် စမ်းသပ်နေတာ ဖြစ်ပြီး၊ ဒါဟာ လူသားအစစ်အမှန် ဖြစ်လာမယ့် စမ်းသပ်မှုမျိုးတော့ မဟုတ်ပါဘူး။
