Elon Musk က လူ့ ဦးနှောက်မှာ Chip ထည့်သွင်းကာ ကွန်ပြူတာနဲ့ စက်ပစ္စည်းတွေကို ထိန်းချုပ်နိုင်တဲ့ နည်းပညာကို တီထွင်ဖို့ Neuralink ကုမ္ပဏီကို တည်ထောင်ထားပါတယ်။
အခုတော့ Elon Musk က အဲဒီ Wireless Brain Chip ကို လူ့ ဦးနှောက်မှာ ပထမဆုံး အကြိမ် ထည့်သွင်းနိုင်ပြီလို့ ကြေညာလိုက်ပါတယ်။ အဲဒီ လူဟာ ကျန်းမာရေး ကောင်းမွန်နေပြီး Musk က အစောပိုင်း ရလဒ်တွေက ကောင်းနေတယ်လို့ X (Twitter) မှာ ရေးသားထားပါတယ်။
Neuralink ဟာ အမေရိကန် FDA ထံကနေ လူ့ ဦးနှောက်မှာ Chip ထည့်သွင်းခွင့်ကို ပြီးခဲ့တဲ့နှစ်မှာ ရရှိခဲ့ပါတယ်။ ဒီလို ခွင့်ပြုချက်ရဖို့ဆိုတာ မလွယ်ကူဘဲ ဒါဟာ Neuralink အတွက် ကြီးမားတဲ့ သမိုင်းမှတ်တိုင် ဖြစ်ပါတယ်။
Neuralink က အဲဒီ Chip ကို Telepathy လို့ အမည်ပေးထားပြီး Musk က ဦးနှောက်ကနေ စဉ်းစားလိုက် သို့မဟုတ် အမိန့်ပေးလိုက်တာနဲ့ ဖုန်းနဲ့ ကွန်ပြူတာကို ထိန်းချုပ်နိုင်တယ်လို့ ပြောပါတယ်။ သူက “ ဦးနှောက်ကနေ စဉ်းစားလိုက် သို့မဟုတ် အမိန့်ပေးလိုက်တာနဲ့ ဖုန်းနဲ့ ကွန်ပြူတာ အပြင် Device အားလုံးနီးပါးကို ထိန်းချုပ်နိုင်ပါတယ်။
Enables control of your phone or computer, and through them almost any device, just by thinking.
Initial users will be those who have lost the use of their limbs.
Imagine if Stephen Hawking could communicate faster than a speed typist or auctioneer. That is the goal.
— Elon Musk (@elonmusk) January 30, 2024
လက် ဆုံးရှုံးထားသူတွေကို အစောဆုံး အသုံးပြုခွင့်ပေးမှာပါ။ စတီဖင်ဟောကင်း စာရိုက် စကားပြောတာထက် ဒီနည်းပညာက ပိုမြန်ပါတယ်။ ဒါဟာ ကျွန်တော်တို့ ရည်မှန်းချက်ပါပဲ။ “ လို့ ပြောပါတယ်။
ဒီနည်းပညာဟာ အကြောသေနေလို့ ကိုယ်လက်အင်္ဂါ မလှုပ်ရှားနိုင်သူတွေအတွက်လည်း အသုံးဝင်မှာ ဖြစ်ပါတယ်။ မကြာခင်ကပဲ အမေရိကန်မှ သုတေသနပညာရှင်တွေဟာ အလားတူ နည်းပညာကို အသုံးပြုကာ လူ့ ဦးနှောက်မှ ပြောလိုက်တဲ့ စကားတွေကို စာသား နဲ့ အသံဖိုင်အဖြစ် ပြောင်းလဲနိုင်ခဲ့ပါတယ်။
Ref : inceptivemind
