အရင်နှစ်တုန်းက Samsung ဟာ Helio P35 SoC ပါတဲ့ Galaxy A12 ကို ကြေညာခဲ့ပြီး အခုတော့ နယ်သာလန်က မီဒီယာ ၁ ခု ဖြစ်တဲ့ GalaxyClub က ကုမ္ပဏီဟာ နောက်မျိုးဆက် Galaxy A13 5G ကို ဖန်တီးနေတယ်လို့ သတင်းပေးလိုက်ပါတယ်။
နာမည်အရ Galaxy A13 5G မှာ နောက်မျိုးဆက် ဆက်သွယ်ရေး နည်းပညာ ဖြစ်တဲ့ 5G ပါလာမှာ သေချာပါတယ်။ အရင်မျိုးဆက် Galaxy A12 မှာတော့ 4G LTE ဆက်သွယ်မှုနဲ့ပဲ ကျေနပ်ခဲ့ရတာပါ။
GalaxyClub က Galaxy A13 5G ရဲ့ Specifications တွေကို ဘာမှ မပြောပေမယ့် မော်ဒယ်ကုဒ်က SM-A136B ဖြစ်တယ်လို့ သတင်းပေးထားပါတယ်။ လက်ရှိ Galaxy A12 လိုပဲ ယူရို ၂၀၀ အောက်နဲ့ Galaxy A13 5G ကို ရောင်းချနိုင်တဲ့အတွက် မြန်မာငွေ ၃ သိန်း ၉ သောင်းအောက်လောက် ကျသင့်နိုင်ပါတယ်။ ဈေးအရမ်း မနည်းပေမယ့် ဈေးသက်သက်သာသာနဲ့ 5G စမတ်ဖုန်း ၁ လုံးကို ကိုင်နိုင်မှာ ဖြစ်ပါတယ်။ Samsung ထုတ်သမျှ စမတ်ဖုန်းတွေထဲမှာ ဈေးအသက်သာဆုံး 5G စမတ်ဖုန်း အဖြစ် မှတ်တမ်းဝင်သွားနိုင်တယ်လို့ သိရပါတယ်။
Samsung က Galaxy A13 5G ကို ကြေညာမယ့်နေ့ အပါအဝင် ဘာသတင်းအချက်အလက်ကိုမှ မပြောသေးဘဲ ရေငုံနှုတ်ပိတ်နေနေပါသေးတယ်။ ဒါပေမယ့် Galaxy A12 ကို အရင်နှစ် နိုဝင်ဘာလမှာ ကြေညာခဲ့တာ ဖြစ်တဲ့အတွက် မျိုးဆက်သစ် Galaxy A13 5G ကိုလည်း အဲဒီ အချိန်လောက်မှာ ချပြနိုင်ပါတယ်။
Ref : gsmarena
