တရုတ် ကုမ္ပဏီက အာကာသ ခရီးသွားလက်မှတ်ကို ဒေါ်လာ ၂၈၀,၀၀၀ နဲ့ ရောင်းချ

တရုတ်ရဲ့ အာကာသ နည်းပညာ ကုမ္ပဏီ Deep Blue Aerospace က ပထမ ၂ ကြိမ် အာကာသခရီးသွားလက်မှတ်ကို ရောင်းချပြီးနောက်မှာ တစ်စောင်ကို ယွမ် ၂ သန်း (ဒေါ်လာ ၂၈၀,၇၅၆) နဲ့ နောက်ထပ် လက်မှတ် အစောင် ၂၀ ကို ထပ်မံ ရောင်းချနေပါတယ်။

ကုမ္ပဏီက Taobao စတိုးမှာ ရောင်းချနေတာ ဖြစ်ပြီး အွန်လိုင်း ကနေ စရန်ငွေ ယွမ် ၁၀၀,၀၀၀ ပေးသူတွေဟာ ဘေဂျင်းမှ သုတေသန စင်တာမှာ စာချုပ်ချုပ်ရမှာ ဖြစ်ကာ ကျန်တဲ့ ငွေကို ပေးရမယ်လို့ ပြောပါတယ်။

Deep Blue ရဲ့ အရောင်းမြှင့်တင်ရေး သတင်းအချက်အလက် အရ အာကာသခရီးစဉ်ကို ၂၀၂၇ ခုနှစ်မှာ ပြုလုပ်ပေးမှာ ဖြစ်ပြီး ခရီးသွားတွေဟာ ကမ္ဘာမြေအထက် ၁၅၀ ကီလိုမီတာမှာ ၁၂ မိနစ်ဝန်းကျင် လည်ပတ်နိုင်မှာ ဖြစ်ပါတယ်။ ကမ္ဘာ့ ဆွဲအားမဲ့တဲ့ အတွေ့အကြုံကို အနည်းဆုံး ၅ မိနစ်ကြာ ခံစားရမှာ ဖြစ်ပါတယ်။

Nebula-1 အမည်ရ ဒုံးပျံဟာ ခရီးသည် ၆ ယောက်ကို အာကာသသို့ ပို့ဆောင်ပေးမှာ ဖြစ်ပြီး Panoramic Windows ၆ ခုကနေ ရှုခင်းတွေကို ကြည့်ရှုနိုင်မှာ ဖြစ်ပါတယ်။ ကမ္ဘာမြေကို ဒုံးပျံ ပြန်လည် ဆင်းသက်တဲ့အခါ လေထီး ဖွင့်ထားမှာ ဖြစ်ပြီး လေထီးဟာ အကြိမ် ၅၀ ကျော် ပြန်လည် အသုံးပြုနိုင်ပါတယ်။

Deep Blue က အသက် ၁၈ နှစ်နဲ့ ၆၀ အကြား ခရီးသွားတွေ အာကာသသို့ ခရီးသွားဖို့ သင့်တော်ပြီး ခရီးမသွားခင် ၁ လ အလိုမှာ လုံခြုံရေးအတွက် သင်တန်းပေးမယ်လို့ ပြောပါတယ်။

Ref : south china morning post