UK က လင်မယားနှစ်ယောက်ကတော့ အိမ်မှုကိစ္စ ခွဲဝေတဲ့နေရာမှာ တော်တော်လေး “ဂေါ်” နေပါတယ်။ သူတို့က “ဒီနေ့ လက်ဖက်ရည် ဘယ်သူဖျော်မလဲ” ဆိုတဲ့ ပြဿနာကို ရှင်းဖို့အတွက် စကားများမနေဘဲ Mario Kart 64 ဂိမ်း ပြိုင်မောင်းပြီး ဖြေရှင်းကြတာပါ။ နိုင်တဲ့လူက ခြေချိတ်ထိုင်နေရုံပါပဲ၊ ရှုံးတဲ့လူကတော့ မီးဖိုချောင်ထဲ ဝင်ပြီး လက်ဖက်ရည် ဖျော်ရမှာ ဖြစ်ပါတယ်။
Claire Monroe နဲ့ Andy Bork တို့ ဇနီးမောင်နှံဟာ ဒီ “ပြိုင်ပွဲ” ကို ၂၀၀၁ ခုနှစ်ကတည်းက စတင်ခဲ့တာဖြစ်ပြီး အခုဆိုရင် ၂၅ နှစ်တောင် ရှိနေပါပြီ။ ဘယ်လောက်ပဲ အလုပ်တွေ ရှုပ်နေပါစေ၊ တစ်နေ့ကို တစ်ပွဲတော့ မဖြစ်မနေ ပြိုင်ကြတုန်းပါပဲ။ အိမ်မှုကိစ္စကို တရားမျှတအောင် ဒီနည်းနဲ့ ဖြေရှင်းကြတာပါတဲ့။
သူတို့ရဲ့ သားဖြစ်သူ Louis က ဒီအကြောင်းကို အွန်လိုင်းမှာ တင်လိုက်တော့ လူပြောများပြီး နာမည်ကြီးသွားခဲ့ပါတယ်။ ရိုးရှင်းတဲ့ ဂိမ်းလေးတစ်ခုက မိသားစုရဲ့ မရှိမဖြစ် အစိတ်အပိုင်းတစ်ခု ဖြစ်လာပုံကို လူတွေ သဘောကျနေကြတာပါ။
သူတို့လင်မယားကတော့ ဒီလို အသေးအဖွဲ ထုံးစံလေးတွေကပဲ တန်ဖိုးအရှိဆုံး အရာတွေ ဖြစ်လာတတ်ပါတယ်လို့ ပြောပါတယ်။ ကဲ… မိတ်ဆွေတို့ရော အိမ်မှာ ပန်းကန်ဆေးတာ၊ ထမင်းချက်တာကို ဘယ်သူလုပ်မလဲ ငြင်းနေမယ့်အစား ဂိမ်းလေး ဘာလေး ဆွဲပြီး ဆုံးဖြတ်ကြမလား။
Ref : Fossbytes
