Facebook တည်ထောင်သူ Mark Zuckerberg ဟာ ဘရာဇီး ဂျူဂျစ်စု သိုင်းပညာ တတ်တဲ့အတွက် အခုတော့ Elon Musk ကလည်း ဂျူဂျစ်စု သင်နေပါပြီ။
နာမည်ကြီး Lex Fridman Podcast ရဲ့ Host ဖြစ်သူ Lex Fridman က Musk နဲ့ ဂျူဂျစ်စု လေ့ကျင့်နေတဲ့ ဗီဒီယို ၁ ခုကို တင်ခဲ့ပါတယ်။
သူက “ အရင်ရက်က နာရီ အနည်းငယ်အကြာ Elon Musk နဲ့ လေ့ကျင့်ခဲ့ပါတယ်။ သူ့ရဲ့ ခွန်အား၊ စွမ်းအားနဲ့ အရည်အချင်းကို အလွန် အထင်ကြီးမိပါတယ်။ “ လို့ ပြောပါတယ်။
Mark Zuckerberg နဲ့ Elon Musk တို့ဟာ ချိန်းထိုးဖို့အတွက် အပြန်အလှန် စိန်ခေါ်နေကြတာပါ။ Meta ဟာ တွစ်တာကို ယှဉ်ပြိုင်မယ့် လူမှုကွန်ရက် ၁ ခုကို ဖန်တီးနေတဲ့ အကြောင်းကို Musk က စကားနာထိုးလိုက်တာကနေ ဒီဇာတ်လမ်း စတင်ခဲ့တာပါ။
တွစ်တာ သုံးသူ ၁ ယောက်က Zuckerberg ဟာ ဂျူဂျစ်စု တတ်လို့ သတိထားပါလို့ ပြောလိုက်တာကို Musk က ကြိုးဝိုင်းထဲ ထိုးချင်ရင် အဆင်သင့်ပဲလို့ တုန့်ပြန်ခဲ့ပါတယ်။
အဲဒီနောက်မှာ Zuckerberg က Musk ရဲ့ ပြောစကားကို Screenshot ရိုက်ကာ ထိုးမယ့်နေရာပြောပါလို့ ပို့စ်တင်ခဲ့ပါတယ်။
သူတို့ ၂ ယောက်ရဲ့ ထိုးသတ်ပွဲဟာ အစကတော့ နောက်ပြောင်နေတယ်လို့ ထင်ရပေမယ့် အခုတော့ Musk က သိုင်းသင်နေတဲ့အတွက် တကယ်ဖြစ်လာမလားဆိုတာ စောင့်ကြည့်ရမှာပါ။
Ref : dtnext
