အမေဇုန် (Amazon) ဟာ မကြာခင်မှာ သင့်အိမ်တိုင်ရာရောက် ပစ္စည်းတွေကို တိုက်ရိုက်လာပို့ပေးနိုင်မယ့် လူသားပုံစံ စက်ရုပ်တွေကို စမ်းသပ်နေပါတယ်။ *The Information* သတင်းဌာနရဲ့ အဆိုအရ အဲဒီစက်ရုပ်တွေကို Rivian လျှပ်စစ်ဗင်ကားတွေထဲမှာ လိုက်ပါစေပြီး ပစ္စည်းပို့ဆောင်ချိန်မှာ ကားပေါ်ကနေ ထွက်ကာ ပို့ပေးနိုင်ဖို့ လေ့ကျင့်ပေးနေတယ်လို့ သိရပါတယ်။
ဆန်ဖရန်စစ္စကိုမြို့မှာရှိတဲ့ “လူသားပုံစံစက်ရုပ် ပန်းခြံ” လို့ အမည်ပြောင်ပေးထားတဲ့ အထူးအဆောက်အအုံတစ်ခုထဲမှာ အဲဒီစမ်းသပ်မှုတွေကို ပြုလုပ်နေတာ ဖြစ်ပါတယ်။ ကော်ဖီဆိုင်တစ်ဆိုင်စာလောက် ကျယ်ဝန်းတဲ့ အဲဒီနေရာမှာ လက်တွေ့ ပစ္စည်းပို့ဆောင်ရတဲ့ အခြေအနေတွေကို ပုံစံတူဖြစ်အောင် ဖန်တီးဖို့အတွက် အတားအဆီးလမ်းကြောတစ်ခုနဲ့ Rivian ဗင်ကားတစ်စီးကို ထားရှိထားပါတယ်။
အမေဇုန်ဟာ ဒီစက်ရုပ်တွေကို မောင်းနှင်ပေးမယ့် AI ဆော့ဖ်ဝဲလ်ကို ကိုယ်တိုင်ရေးဆွဲနေပြီး စက်ရုပ်ရဲ့ ကိုယ်ထည် (hardware) ကိုတော့ တခြားကုမ္ပဏီတွေက ထုတ်လုပ်တာကို အသုံးပြုနေပါတယ်။ ရည်မှန်းချက်ကတော့ နောက်ဆုံးမှာ ဒီစက်ရုပ်တွေကို စမ်းသပ်တဲ့နေရာကနေ အပြင်က ရပ်ကွက်တွေထဲကို ခေါ်ထုတ်ပြီး တကယ့် ကုန်ပစ္စည်းတွေကို ပို့ဆောင်ခိုင်းဖို့ ဖြစ်ပါတယ်။
အခု စီမံကိန်းဟာ အမေဇုန်ရဲ့ ပိုမိုကျယ်ပြန့်တဲ့ စက်ရုပ်နည်းပညာနဲ့ AI ကို တွန်းအားပေးလုပ်ဆောင်နေမှုရဲ့ တစ်စိတ်တစ်ပိုင်းဖြစ်ပါတယ်။ အဲဒီထဲမှာ ပစ္စည်းပို့ဝန်ထမ်းတွေအတွက် စမတ်မျက်မှန်တွေ၊ ကုန်လှောင်ရုံနဲ့ ပို့ဆောင်ရေးလုပ်ငန်းတွေကို ပိုမိုကောင်းမွန်အောင် လုပ်ဆောင်ပေးမယ့် အဆင့်မြင့် AI စနစ်တွေလည်း ပါဝင်ပါတယ်။
အမေဇုန်ရဲ့ ကုန်ပစ္စည်းပို့ဆောင်တဲ့ လူတူစက်ရုပ်တွေ ဘယ်အချိန်မှာ ထွက်လာမလဲ ဆိုတာ မသိရသေးပေမယ့် စမ်းသပ်မှုတွေကတော့ အစောပိုင်းအဆင့်မှာပဲ ရှိပါသေးတယ်။
Ref : Technology Innovation
