OpenAI ရဲ့ ChatGPT ဟာ ကမ္ဘာမှာ အသုံးအများဆုံး AI tool တွေထဲက တစ်ခုဖြစ်လာနေပါတယ်။ အဲဒီ chatbot ဟာ အခုအခါ နေ့စဉ်အသုံးပြုသူတွေရဲ့ တောင်းဆိုမှု (request) ၂.၅ ဘီလီယံကျော် လက်ခံရရှိနေပါတယ်။ အဲဒီထဲက သန်း ၃၃၀ လောက်ကတော့ အမေရိကန်ပြည်ထောင်စုက ဖြစ်ပါတယ်။ ဒီအချက်အလက်ကို Axios က ပထမဆုံးဖော်ပြခဲ့တာဖြစ်ပြီး နောက်ပိုင်းမှာ OpenAI ရဲ့ ပြောရေးဆိုခွင့်ရှိသူ Rob Friedlander က The Verge ကို ထုတ်ပြန်တဲ့ ကြေညာချက်တစ်ခုမှာ အတည်ပြုခဲ့ပါတယ်။
ဒီနှုန်းအတိုင်းသာ ဆက်သွားမယ်ဆိုရင် ChatGPT ဟာ တစ်နှစ်အတွင်းမှာ တောင်းဆိုမှုပေါင်း ၉၁၂ ဘီလီယံကျော် ရရှိနိုင်ပါတယ်။ ဒါဟာ ဘယ်လိုပဲတိုင်းတာပါစေ အလွန်ကြီးမားတဲ့ အရေအတွက်တစ်ခု ဖြစ်ပါတယ်။ တစ်နှစ်ကို ရှာဖွေမှုအကြိမ်ရေ ၅ ထရီလီယံလောက် ရရှိတဲ့ Google နဲ့ အများကြီးကွာဟနေသေးပေမယ့် ChatGPT ရဲ့ အလျင်အမြန်တိုးတက်မှုက မဝေးတော့တဲ့အနာဂတ်မှာ တကယ့်ပြိုင်ဘက်စစ်စစ် ဖြစ်လာနိုင်တယ်ဆိုတဲ့ အဓိပ္ပာယ်ကို ဆောင်နေပါတယ်။
ChatGPT ကို အသုံးပြုသူအရေအတွက်ဟာ အလွန်လျင်မြန်စွာ တိုးတက်နေပါတယ်။ အဲဒီ chatbot ဟာ ၂၀၂၄ ခုနှစ် ဒီဇင်ဘာလမှာ အပတ်စဉ်အသုံးပြုသူ သန်း ၃၀၀ လောက်ရှိခဲ့ရာကနေ ၂၀၂၅ ခုနှစ် မတ်လမှာတော့ သန်း ၅၀၀ ကျော်အထိ ရောက်ရှိခဲ့ပါတယ်။ အဲဒီလို ခုန်တက်သွားတာဟာ လူသားတွေက သူတို့ရဲ့ဘဝတွေထဲကို AI tool တွေကို ဘယ်လောက်မြန်မြန် သွတ်သွင်းအသုံးပြုနေသလဲဆိုတဲ့ နှုန်းကို ပြနေပါတယ်။
ChatGPT က နေ့စဉ်တောင်းဆိုမှု ဘီလီယံချီကို ကိုင်တွယ်နေပြီ — နောက်ဘာဆက်လာမလဲ
OpenAI ဟာ chatbot တစ်ခုတည်းနဲ့ ရပ်တန့်နေတာမဟုတ်ဘဲ Google လို နည်းပညာကုမ္ပဏီကြီးတွေနဲ့ တိုက်ရိုက်ယှဉ်ပြိုင်ဖို့ ရှေ့ဆက်ဝင်ရောက်လာဖို့ ပြင်ဆင်နေပါတယ်။ Reuters သတင်းဌာနက ပြီးခဲ့တဲ့အပတ်မှာ ဖော်ပြခဲ့သလို OpenAI ဟာ AI စွမ်းအင်သုံး web browser တစ်ခုကို မိတ်ဆက်ဖို့ ပြင်ဆင်နေပါတယ်။ အဲဒါဟာ နောက်ထပ် ရက်သတ္တပတ်အနည်းငယ်အတွင်း ထွက်ရှိလာမှာဖြစ်ပြီး Google Chrome နဲ့ Edge လို အဓိက browser တွေနဲ့ ယှဉ်ပြိုင်နိုင်စွမ်းရှိမှာ ဖြစ်ပါတယ်။
ဒါ့အပြင် OpenAI ဟာ ChatGPT Agent လို့ခေါ်တဲ့ feature အသစ်တစ်ခုကိုလည်း ထုတ်ပြန်ထားပါတယ်။ အဲဒီ tool က ဖိုင်တွေဖွင့်တာ၊ အီးမေးလ်တွေ စီမံခန့်ခွဲတာ၊ ဒါမှမဟုတ် software တွေကို လေ့လာစူးစမ်းတာတွေလိုမျိုး အလုပ်တွေကို သင့်ကွန်ပျူတာပေါ်မှာ တိုက်ရိုက်လုပ်ဆောင်ပေးနိုင်ပါတယ်။ ဒါဟာ ChatGPT ကို စကားပြော tool တစ်ခုအဖြစ်ကနေ virtual assistant အပြည့်အဝတစ်ခုအဖြစ်ကို အဆင့်မြှင့်တင်လိုက်တဲ့ ကောင်းမွန်တဲ့ ခြေလှမ်းတစ်ခု ဖြစ်ပါတယ်။
အသုံးများလာတာ၊ အလျင်အမြန်တိုးချဲ့လာတာနဲ့ လုပ်ဆောင်ချက်အသစ်တွေ ထပ်ထည့်လာတာတွေက OpenAI ကို နည်းပညာကုမ္ပဏီတွေရဲ့ ထိပ်တန်းနေရာကို ပို့ဆောင်ပေးနေပါတယ်။ Google ဟာ web search မှာ ဦးဆောင်နေဆဲဖြစ်ပေမယ့် အခုအခါမှာတော့ လျင်မြန်စွာကြီးထွားလာနေတဲ့ အစွမ်းထက် AI assistant တစ်ခုနဲ့ ပြင်းပြင်းထန်ထန် ယှဉ်ပြိုင်နေရပါတယ်။
OpenAI က ဆက်လက်တိုးတက်ပြောင်းလဲနေတာနဲ့အမျှ ကျွန်တော်တို့ ရှာဖွေတာ၊ browse လုပ်တာနဲ့ digital tool တွေကို အသုံးပြုတဲ့ပုံစံတွေဟာ တော်လှန်ပြောင်းလဲသွားနိုင်ပါတယ်။ ChatGPT ဟာ Google ရဲ့အဆင့်ကို မရောက်သေးပေမယ့် ထည့်သွင်းစဉ်းစားရမယ့် ပြိုင်ဘက်တစ်ခု ဖြစ်လာနေပါပြီ။
Ref : Gizchina
