တရုတ်နိုင်ငံရဲ့ အာကာသအခြေစိုက် နေရောင်ခြည်စွမ်းအင်သုံး လျှပ်စစ်စင်တာစီမံကိန်းဟာ ကမ္ဘာကြီးအတွက် သန့်ရှင်းတဲ့စွမ်းအင် ထုတ်ပေးရုံတင်မကဘဲ အီလက်ထရွန်နစ်စစ်ပွဲတွေမှာ အသုံးပြုနိုင်တဲ့ ကြောက်စရာကောင်းတဲ့ စစ်လက်နက်တစ်ခုလည်း ဖြစ်လာနိုင်တယ်လို့ သိပ္ပံပညာရှင်တွေက သတိပေးလိုက်ပါတယ်။ ဒီစနစ်ဟာ အာကာသထဲမှာ နေရောင်ခြည်ကို အဆက်မပြတ်စုဆောင်းပြီး ကမ္ဘာမြေဆီကို အလွန်ပြင်းအားကောင်းတဲ့ မိုက်ခရိုဝေ့ဖ်လှိုင်းတွေ (Microwave beams) နဲ့ ပစ်လွှတ်ပေးပို့မှာ ဖြစ်ပါတယ်။
စီမံကိန်းရဲ့ အဓိကဗိသုကာပညာရှင် Duan Baoyan ရဲ့ အဆိုအရ “Zhuri” (နေမင်းကို လိုက်လံဖမ်းဆီးခြင်း) လို့ အမည်ပေးထားတဲ့ ဒီစနစ်ကို စွမ်းအင်ပေးပို့ရုံတင်မကဘဲ ရန်သူ့ဆက်သွယ်ရေးတွေကို နှောင့်ယှက်ဖျက်ဆီးတာ၊ ထောက်လှမ်းရေးလုပ်တာနဲ့ လမ်းညွှန်မှုစနစ်တွေကို ထိန်းချုပ်တာမျိုးတွေပါ လုပ်ဆောင်နိုင်အောင် ပြန်လည်ဒီဇိုင်းထုတ်ထားတယ်လို့ ဆိုပါတယ်။ အထူးသဖြင့် အကွာအဝေး မြင့်မားတဲ့နေရာကနေ ပစ်လွှတ်နိုင်တဲ့ တိကျလွန်းတဲ့ လှိုင်းစီးကြောင်းတွေဟာ စစ်ဗျူဟာမြောက် လက်နက်တစ်ခုလို အသုံးချခံရနိုင်ခြေ ရှိနေတာပါ။
အာကာသအခြေစိုက် စွမ်းအင်ထုတ်လုပ်မှု (SBSP) နည်းပညာကို အမေရိကန်ရဲ့ NASA နဲ့ ဥရောပအာကာသအေဂျင်စီတို့ကလည်း အသီးသီး သုတေသနပြုနေကြပေမဲ့ တရုတ်ရဲ့ ချဉ်းကပ်ပုံကတော့ စစ်ဘက်ဆိုင်ရာ အားသာချက်တွေပါ ပေါင်းစပ်ထားပုံရပါတယ်။ အာကာသထဲမှာ ကီလိုမီတာချီ ကျယ်ဝန်းတဲ့ အဆောက်အအုံကြီးတွေ တည်ဆောက်ဖို့ဆိုတာ နည်းပညာအရ စိန်ခေါ်မှုကြီးမားပေမဲ့ အောင်မြင်သွားခဲ့ရင်တော့ ဒါဟာ တစ်နေ့ ၂၄ နာရီပတ်လုံး စွမ်းအင်ရရှိမယ့် နည်းလမ်းသစ်တစ်ခု ဖြစ်လာမှာပါ။
တရုတ်နိုင်ငံဟာ အာကာသထဲမှာ လေယာဉ်တင်သင်္ဘောကြီးတွေ ထားရှိဖို့နဲ့ လပေါ်မှာ နျူကလီးယားဓာတ်ပေါင်းဖို တည်ဆောက်ဖို့အထိ စိတ်ကူးယဉ်ဆန်တဲ့ စီမံကိန်းတွေကို အကောင်အထည်ဖော်နေတာပါ။ အခု Zhuri စနစ်ဟာလည်း အနာဂတ်မှာ အာကာသကွန်ရက်ကို စိုးမိုးမယ့် ဗျူဟာမြောက် အဆောက်အအုံတစ်ခု ဖြစ်လာနိုင်ပြီး စွမ်းအင်ထုတ်လုပ်မှုနဲ့ စစ်ရေးစွမ်းရည်ကြားက နယ်နိမိတ်ကို ဝေဝါးသွားစေနိုင်တယ်လို့ ကျွမ်းကျင်သူတွေက သုံးသပ်နေကြပါတယ်။
Ref : Interesting Engineering
