တရုတ်နိုင်ငံရဲ့ အမျိုးသားကာကွယ်ရေးနည်းပညာတက္ကသိုလ် (NUDT) မှာရှိတဲ့ စက်ရုပ်သုတေသနဓာတ်ခွဲခန်းတစ်ခုက လျှို့ဝှက်ကင်းထောက်ခြင်းနဲ့ တခြားမထင်မရှားစစ်ဆင်ရေးတွေအတွက် ရည်ရွယ်တဲ့ ခြင်နဲ့တူတဲ့ အလွန်သေးငယ်တဲ့ ဒရုန်းတစ်ခုကို တီထွင်လိုက်ပါတယ်။ အဲဒီတီထွင်မှုကို တရုတ်နိုင်ငံရဲ့ စစ်ရေးသီးသန့်ရုပ်သံလိုင်းဖြစ်တဲ့ CCTV-7 မှာ မကြာသေးခင်က ထုတ်လွှင့်ပြသခဲ့ပြီး ဒါက နိုင်ငံရဲ့ စက်ရုပ်အင်ဂျင်နီယာပိုင်းမှာ သိသိသာသာ တိုးတက်လာတာကို ဖော်ပြနေပါတယ်။
NUDT ကျောင်းသားတစ်ဦးဖြစ်တဲ့ လျန်ဟယ်ရှန်က ပြသခဲ့တဲ့ အင်းဆက်ပိုးမွှားပုံစံဒရုန်းဟာ အလွန်သေးငယ်ပြီး ကိုယ်ထည်အရှည် ၁.၃ စင်တီမီတာကနေ ၂ စင်တီမီတာကြားရှိကာ အလေးချိန် ০.၃ ဂရမ်အောက်သာ ရှိတယ်လို့ သိရပါတယ်။ သူ့ရဲ့ဒီဇိုင်းမှာ သစ်ရွက်ပုံစံတောင်ပံနှစ်ခုနဲ့ သွယ်လျတဲ့ “ခြေထောက်” သုံးချောင်းပါဝင်ပြီး အင်းဆက်တစ်ကောင်ရဲ့ ပုံပန်းသဏ္ဍာန်နဲ့ လှုပ်ရှားမှုကို အတုခိုးနိုင်စွမ်းရှိတာကြောင့် သာမန်မျက်စိနဲ့ဖြစ်စေ၊ သမားရိုးကျရေဒါစနစ်တွေနဲ့ဖြစ်စေ ရှာဖွေတွေ့ရှိဖို့ ခက်ခဲစေပါတယ်။
“ဒီလိုမျိုး သေးငယ်တဲ့ ဇီဝအတုခိုးစက်ရုပ်တွေဟာ စစ်မြေပြင်မှာ သတင်းအချက်အလက်ကင်းထောက်တာနဲ့ အထူးစစ်ဆင်ရေးတွေအတွက် အထူးသင့်တော်ပါတယ်” လို့ လျန်က ရုပ်သံထုတ်လွှင့်မှုအတွင်းမှာ အဲဒီသေးငယ်တဲ့စက်ပစ္စည်းလေးကို သူ့ရဲ့လက်ချောင်းတွေကြားမှာ ကိုင်ပြရင်း ပြောကြားခဲ့ပါတယ်။
အဲဒီဒရုန်းမှာ အလွန်သေးငယ်တဲ့ ကင်မရာတွေနဲ့ မိုက်ခရိုဖုန်းတွေ တပ်ဆင်ထားပြီး ရုပ်ပုံတွေ၊ အသံတွေနဲ့ တခြားအီလက်ထရောနစ်အချက်ပြမှုတွေကို ဖမ်းယူနိုင်တယ်လို့ ဆိုပါတယ်။ စမတ်ဖုန်းကနေတစ်ဆင့် ထိန်းချုပ်နိုင်တဲ့ တောင်ပံလေးခုပါ ရှေ့ပြေးပုံစံတစ်ခုကိုလည်း ပြသခဲ့ပြီး ဒီအဆင့်မြင့် ကိရိယာကို အလွယ်တကူအသုံးပြုနိုင်တာကို မီးမောင်းထိုးပြခဲ့ပါတယ်။
ဒီလိုသေးငယ်ပြီး ရှုပ်ထွေးတဲ့စက်ပစ္စည်းတစ်ခုကို တီထွင်ရတာဟာ အင်ဂျင်နီယာပိုင်းဆိုင်ရာ စိန်ခေါ်မှုကြီးတစ်ခုဖြစ်ပါတယ်။ အာရုံခံကိရိယာတွေ၊ ပါဝါရင်းမြစ်၊ ထိန်းချုပ်ပတ်လမ်းတွေနဲ့ ဆက်သွယ်ရေးအစိတ်အပိုင်းတွေကို လက်တစ်ဆစ်ထက်ငယ်တဲ့ ကိုယ်ထည်တစ်ခုထဲမှာ ထည့်သွင်းရတာကြောင့် အဏုစက်ပစ္စည်းအင်ဂျင်နီယာပညာ၊ ဒြပ်ပစ္စည်းသိပ္ပံနဲ့ ဇီဝအတုခိုးပညာရပ်တွေလို ဘာသာရပ်မျိုးစုံရဲ့ ပူးပေါင်းဆောင်ရွက်မှု လိုအပ်ပါတယ်။
တရုတ်နိုင်ငံရဲ့ မိုက်ခရိုဒရုန်းအသစ်ဟာ စစ်ရေးနည်းပညာလောကထဲကို ဝင်ရောက်လာတာဖြစ်ပြီး အဲဒီလောကမှာ သေးငယ်အောင်ပြုလုပ်ခြင်းက အဓိကရည်မှန်းချက်တစ်ခု ဖြစ်နေပါတယ်။
Ref : South China Morning Post
