တရုတ်စက်ရုပ်ကုမ္ပဏီ Fourier Robotics က သူ့ရဲ့ ပထမဆုံး လူအရွယ်အစားအပြည့်ရှိတဲ့ လူတူစက်ရုပ် GR-3 “Care-bot” ကို ထုတ်ဖော်ပြသလိုက်ပါတယ်။
GR-3 စက်ရုပ်ကို အဝေးကနေ ထိန်းချုပ်နိုင်ပါတယ်၊ ဘာသာစကားအမျိုးမျိုးကို ပြောဆိုနိုင်ပြီး ပြတိုက်က အနုပညာပစ္စည်းတွေလိုမျိုး အသေးစိတ်အချက်အလက်တွေကို မှတ်မိနိုင်ပါတယ်။ GR-3 ဟာ အရပ် ၁၆၅ စင်တီမီတာ မြင့်ပြီး ကိုယ်အလေးချိန် ၇၁ ကီလိုဂရမ် ရှိပါတယ်။
အဲဒီစက်ရုပ်ဟာ မျက်တောင်ခတ်တာ၊ မျက်လုံးနဲ့ လိုက်ကြည့်တာ၊ လက်ပြတာတွေလိုမျိုး သက်ရှိဆန်တဲ့ အမူအရာတွေနဲ့ သဘာဝကျကျ လှုပ်ရှားနိုင်ပါတယ်။ သူ့ရဲ့ စိတ်ခံစားမှုဆိုင်ရာ ဉာဏ်ရည်တုစနစ်က အမြင်၊ အကြား နဲ့ အထိအတွေ့ကို အချိန်နဲ့တပြေးညီ ပေါင်းစပ်ထားတဲ့ စနစ်ကနေ ရရှိတာပါ။ အဆက်မပြတ် အသုံးပြုနိုင်ဖို့ ဘက်ထရီကို လဲလှယ်နိုင်တဲ့စနစ် ပါရှိပြီး “ပေါ့ပါးတဲ့ လမ်းလျှောက်ပုံ” ဒါမှမဟုတ် “ပင်ပန်းနွမ်းနယ်တဲ့ပုံစံ” တွေလို လမ်းလျှောက်ပုံစံအမျိုးမျိုးနဲ့ လျှောက်နိုင်ပါတယ်။
GR-3 ကို အဖော်အဖြစ်၊ ကျန်းမာရေးစောင့်ရှောက်မှု၊ ပြန်လည်ထူထောင်ရေး နဲ့ ပညာရေးတွေအတွက် ဒီဇိုင်းထုတ်ထားတာပါ။ အဲဒါကြောင့် အိမ်တွေ၊ ဆေးရုံတွေ၊ သက်ကြီးရွယ်အို စောင့်ရှောက်ရေးစင်တာတွေ နဲ့ ကျောင်းတွေမှာ အခန်းကဏ္ဍတစ်ခုအနေနဲ့ ပါဝင်လာဖို့ ရှိပါတယ်။ အခုချိန်မှာ အများအပြား ထုတ်လုပ်နေတာ မဟုတ်သေးပေမယ့် မကြာခင်မှာ စောင့်ရှောက်ရေးဌာနတွေမှာ စတင်အသုံးပြုဖို့ မျှော်လင့်ထားပါတယ်။ ဈေးနှုန်းကိုတော့ မကြေညာသေးပေမယ့် အစောပိုင်း GR မော်ဒယ်တွေတုန်းကတော့ ဒေါ်လာ ၁ သိန်းကျော် ကုန်ကျခဲ့ပါတယ်။
Ref : Technology Innovation
