Google ရဲ့ Gemini AI မှာ အကြီးအကျယ် အောင်မြင်ခဲ့တဲ့ Nano Banana AI ဟာ အခု Google Photos ထဲကိုပါ ရောက်လာတော့မှာ ဖြစ်ပါတယ်။
ဒါရဲ့ အဓိပ္ပာယ်ကတော့ ခင်ဗျားအနေနဲ့ ဓာတ်ပုံတစ်ပုံကို ဘယ်လိုပြင်ချင်တယ်ဆိုတာကို Google Photos ထဲမှာတင် စာရိုက်ပြီး (ဒါမှမဟုတ် စကားပြောပြီး) ဖော်ပြနိုင်တော့မှာ ဖြစ်ပါတယ်။ Editor ထဲက Help me edit ဆိုတာကို နှိပ်ပြီး Nano Banana ကို ခင်ဗျား လိုချင်တဲ့ပုံစံ ပြောလိုက်ရုံပါပဲ။ ကျန်တာ သူ အကုန် တာဝန်ယူ လုပ်ဆောင်ပေးသွားမှာပါ။
ဒါတင်မကသေးပါဘူး။ Google Photos မှာ Create with AI (AI နဲ့ ဖန်တီးမယ်) ဆိုတဲ့ ကဏ္ဍသစ်တစ်ခုကိုလည်း Google က ထည့်သွင်းပေးနေပါတယ်။ ဒီကဏ္ဍမှာ အသင့်သုံးနိုင်တဲ့ AI template တွေကို အဆင်သင့် ထည့်သွင်းပေးထားမှာ ဖြစ်လို့ ခင်ဗျားအနေနဲ့ ကိုယ်ပိုင် prompt တွေကို ခေါင်းစားခံပြီး စဉ်းစားနေစရာတောင် မလိုတော့ပါဘူး။
ဒီ feature ကို “ဒီအပတ်ကစပြီး” US နဲ့ India မှာ စတင် အသုံးပြုခွင့် ပေးနေပါတယ်။ အဲဒီ template တွေကိုလည်း Nano Banana ကပဲ ဖန်တီးပေးထားတာ ဖြစ်ပါတယ်။
ဒါ့အပြင် “လာမယ့် ရက်သတ္တပတ်တွေအတွင်းမှာ” US မှာရှိတဲ့ သုံးစွဲသူတွေအတွက် personalized templates တွေကိုပါ ထပ်မံ ထုတ်ပေးဦးမှာ ဖြစ်ပါတယ်။ ကုမ္ပဏီက ပြောတာကတော့၊ အဲဒီ template တွေဟာ “ခင်ဗျားရဲ့ ဓာတ်ပုံ gallery ထဲက ခင်ဗျားအကြောင်း အချက်အလက်တွေကို သုံးပြီး ခင်ဗျားရဲ့ ဝါသနာတွေ၊ အတွေ့အကြုံတွေနဲ့ တစ်မူထူးခြားတဲ့ ပြင်ဆင်မှုတွေကို” ဖန်တီးပေးမှာ ဖြစ်တယ်လို့ ဆိုပါတယ်။
Ask Photos (ဓာတ်ပုံတွေကို AI နဲ့ ရှာပေးတဲ့၊ မေးခွန်းတွေမေးနိုင်တဲ့ feature) ကိုလည်း အခု နိုင်ငံနဲ့ ဒေသသစ် “၁၀၀ ကျော်” မှာ ထပ်တိုးချဲ့လိုက်ပြီး ဘာသာစကားသစ် ၁၇ မျိုးနဲ့ပါ အသုံးပြုနိုင်ပြီ ဖြစ်ပါတယ်။ ဒါပေမဲ့ EU နဲ့ UK မှာတော့ မရသေးပါဘူး။
ဓာတ်ပုံရဲ့ အကြောင်းအရာနဲ့ ပတ်သက်ပြီး ချက်ချင်း အဖြေရှာပေးနိုင်မယ့် Ask ခလုတ်အသစ်တစ်ခုလည်း ပါလာပါသေးတယ်။ ပြီးတော့ US မှာရှိတဲ့ iOS သုံးစွဲသူတွေအတွက်၊ ကိုယ်လိုချင်တဲ့ ပြင်ဆင်မှုတွေကို စာနဲ့ဖော်ပြပြီး ပြင်ခိုင်းနိုင်တဲ့ feature အပါအဝင် ဒီဇိုင်းပုံစံ ပြန်လည်မွမ်းမံထားတဲ့ photo editor အသစ်ကိုလည်း စတင် ထုတ်ပေးနေပြီ ဖြစ်ပါတယ်။
Ref : gsmarena
