အိမ်အလုပ်တွေမှာ ကူညီပေးဖို့ ဖန်တီးထားတဲ့ စက်ရုပ်တစ်ရုပ်က အခုတော့ ကုမ္ပဏီတစ်ခုလုံးရဲ့ ဦးဆောင်သူ CEO ဖြစ်လာပြီဆိုရင် သင်အံ့ဩသွားမလား။ ဒါဟာ သိပ္ပံစိတ်ကူးယဉ်ရုပ်ရှင်ထဲက ဇာတ်လမ်းတစ်ပုဒ်မဟုတ်ဘဲ တောင်ကိုရီးယားနိုင်ငံမှာ တကယ်ဖြစ်ပျက်သွားတဲ့ သမိုင်းဝင်အလှည့်အပြောင်းတစ်ခုပါပဲ။
တောင်ကိုရီးယားကုမ္ပဏီတစ်ခုက သူတို့ရဲ့ CEO အသစ်အဖြစ် ‘Neo’ လို့အမည်ရတဲ့ AI စက်ရုပ်ကို ခန့်အပ်လိုက်တဲ့ ရဲရင့်တဲ့ခြေလှမ်းဟာ ကမ္ဘာတစ်ဝန်းက နည်းပညာလောကကို အကြီးအကျယ် လှုပ်ခတ်သွားစေခဲ့ပါတယ်။ ဒီဖြစ်ရပ်ဟာ Artificial Intelligence (AI) ဟာ လူသားတွေအတွက် အထောက်အကူပြု ‘ကိရိယာ’ တစ်ခုအဖြစ်ကနေ ကုမ္ပဏီရဲ့ အမြင့်ဆုံးအဆင့်မှာ ဦးဆောင်လမ်းညွှန်ပေးနိုင်တဲ့ ‘ခေါင်းဆောင်’ တစ်ဦးအဖြစ် ပြောင်းလဲလာတဲ့ ခေတ်သစ်ရဲ့အနာဂတ်ကိုပြလိုက်တာပဲ ဖြစ်ပါတယ်။
မူလက အိမ်တွင်းသုံးအဖြစ် ဖန်တီးခဲ့တဲ့ Neo ကို အခုအခါမှာတော့ ရှုပ်ထွေးတဲ့ ဒေတာအချက်အလက်တွေကို ခွဲခြမ်းစိတ်ဖြာတာ၊ ဈေးကွက်ခန့်မှန်းတာ၊ မဟာဗျူဟာမြောက် ဆုံးဖြတ်ချက်တွေချတာလိုမျိုး လူသားအမှုဆောင်တွေပဲ လုပ်နိုင်ခဲ့တဲ့ အလုပ်တာဝန်တွေကို ထမ်းဆောင်နိုင်အောင် လေ့ကျင့်ပေးထားပါတယ်။ ကုမ္ပဏီဘက်ကတော့ AI ရဲ့ ဘက်လိုက်မှုကင်းကင်းနဲ့ ဧရာမအချက်အလက်ပမာဏကို အချိန်တိုအတွင်း မြန်နှုန်းမြင့်မားစွာ စီမံခန့်ခွဲနိုင်စွမ်းဟာ အရင်ကမဖြစ်နိုင်ခဲ့တဲ့ ထိရောက်မှုနဲ့ တိကျပြတ်သားမှုကို ယူဆောင်လာပေးနိုင်လိမ့်မယ်လို့ ယုံကြည်နေပါတယ်။
ဒီလိုခြေလှမ်းသစ်ကြီးဟာ သမားရိုးကျခေါင်းဆောင်မှုဆိုတဲ့ အယူအဆကို စိန်ခေါ်လိုက်ရုံသာမက၊ အနာဂတ်ကော်ပိုရိတ်အုပ်ချုပ်ရေး၊ အမှုဆောင်ရာထူးတွေမှာ လူသားတွေရဲ့ အခန်းကဏ္ဍနဲ့ အာဏာကိုင်စွဲထားတဲ့ AI ရဲ့ ကျင့်ဝတ်ပိုင်းဆိုင်ရာ ကိစ္စရပ်တွေအပေါ်မှာလည်း မေးခွန်းတွေ အများကြီးမွေးထုတ်လိုက်ပါတယ်။ Neo လို AI စနစ်တွေက စီးပွားရေးလုပ်ငန်းတွေကို မြှင့်တင်ပေးနိုင်စွမ်း ရှိကောင်းရှိနိုင်ပေမယ့်၊ AI ခေါင်းဆောင်တစ်ဦးရဲ့ လက်အောက်မှာ ဝန်ထမ်းတွေရဲ့ စိတ်ဓာတ်နဲ့ လူလူချင်းဆက်ဆံရေးကို ကုမ္ပဏီက ဘယ်လိုစီမံခန့်ခွဲမလဲဆိုတာကိုတော့ ကျွမ်းကျင်သူတွေက စိတ်ဝင်တစား စောင့်ကြည့်နေကြပါတယ်။
AI CEO တစ်ဦးရဲ့ ခေတ်ဦးအစဖြစ်တဲ့ ဒီဖြစ်ရပ်ဟာ အနာဂတ်ကုမ္ပဏီတွေအတွက် AI-မောင်းနှင်တဲ့ ခေါင်းဆောင်မှုကို ကျင့်သုံးဖို့ ရှေ့ဆောင်လမ်းပြမော်ဒယ်တစ်ခု ဖြစ်လာနိုင်ပြီး၊ ကော်ပိုရိတ်လောကမှာ အလိုအလျောက်စနစ်နဲ့ AI နည်းပညာတွေအတွက် တံခါးသစ်တစ်ခုကို ဖွင့်လှစ်လိုက်သလိုပါပဲ။
Ref : Tech Explorers
