Samsung ဟာ မကြာခင်ကပဲ Foldable ဖုန်းတွေ ဖြစ်တဲ့ Galaxy Z Fold3 နဲ့ Galaxy Z Flip3 တို့ကို ပူပူနွေးနွေး ကြေညာခဲ့ပါတယ်။ အဲဒီ ဖုန်းတွေကို မရောင်းသေးပေမယ့် ကြိုတင်မှာယူခွင့်ပြုထားပါပြီ။ ဒီလ ၁၇ ရက်ကနေ ၂၃ ရက်နေ့အတွင်း ကြိုတင်မှာယူခွင့်ပြုထားတာ ဖြစ်ပြီး အလုံးရေ ၄၅၀,၀၀၀ ကျော် ရောင်းချထားနိုင်ပြီ ဖြစ်တဲ့အတွက် ရောင်းအားလန်းနေပါတယ်။
ကြိုတင်မှာယူမှုဟာ အလုံးရေ ၆၀၀,၀၀၀ လောက်ရှိသွားနိုင်ပြီး Unlocked မော်ဒယ်တွေပါ ထည့်တွက်ရင် အလုံးရေ ၈၀၀,၀၀၀ လောက် ဖြစ်သွားနိုင်ပါတယ်။ နှိုင်းယှဉ်ရရင် Samsung Galaxy Z Fold2 ကို ကြိုတင်မှာယူမှုဟာ အလုံးရေ ၈၀,၀၀၀ လောက်ပဲ ရှိပါတယ်။
Samsung ရဲ့ Foldable စမတ်ဖုန်း အသစ်တွေဟာ ဒီဇိုင်းလန်းတဲ့အတွက် လူငယ်တွေအကြားမှာ ရေပန်းစားနေတာ အံ့အားသင့်စရာ မလိုပါဘူး။ မိုဘိုင်း အော်ပရေတာ ၁ ခုရဲ့ ကိန်းဂဏန်းတွေအရ Galaxy Z Fold3 ကို ကြိုတင်ဝယ်ယူသူတွေရဲ့ ၄၉ ရာခိုင်နှုန်းနဲ့ Galaxy Z Flip3 ကို ကြိုတင်မှာယူသူတွေရဲ့ ၅၇ ရာခိုင်နှုန်းဟာ ဟာ အသက် ၂၀ ကနေ ၃၀ အတွင်းရှိတယ်လို့ ပြောပါတယ်။
Samsung ဟာ Xiaomi လို တရုတ် စမတ်ဖုန်း ကုမ္ပဏီတွေရဲ့ ခြိမ်းခြောက်မှုကို ရင်ဆိုင်နေရပြီး အဲဒီအတွက် Samsung ဟာ ကမ္ဘာ့ နံပါတ် ၁ နေရာကို ကာကွယ်ဖို့ Foldable စမတ်ဖုန်းတွေကို တိုးမြှင့် ထုတ်လုပ်နေပါတယ်။ Samsung ဟာ ဈေးကွက်ထဲမှာ Foldable စမတ်ဖုန်းတွေ အများဆုံး ထုတ်လုပ်ထားတဲ့ ကုမ္ပဏီ ဖြစ်ပြီး တခြား ကုမ္ပဏီတွေဟာ ပထမဆုံး Foldable ဖုန်းတောင် မထုတ်နိုင်သေးပါဘူး။
Ref : gizmochina
