Samsung က အသစ်စက်စက် Galaxy Z Fold7 ကို ကြေညာလိုက်ပါတယ်။ ဒါဟာ Z Fold စီးရီးအတွက် နှစ်တွေအတွင်း အကြီးမားဆုံး အပြောင်းအလဲလို့ ပြောနိုင်ပြီး ပိုကြီးတဲ့မျက်နှာပြင်တွေ၊ ပိုပါးလွှာတဲ့ကိုယ်ထည်နဲ့ 200MP ကင်မရာတို့ ပါဝင်လာပါတယ်။
Galaxy Z Fold7 ဟာ ၂၁၅ ဂရမ်ပဲ လေးပြီး Galaxy S25 Ultra ထက်တောင် ပိုပေါ့ပါးသလို၊ မနှစ်ကထွက်ခဲ့တဲ့ Z Fold6 ထက်လည်း ၂၄ ဂရမ် ပိုပေါ့သွားပါတယ်။
ဒီလိုပါးလွှာသွားတာက Armor FlexHinge အသစ်နဲ့ Armor Aluminum ကိုယ်ထည်ဘောင်အသစ်ကြောင့် ဖြစ်ပါတယ်။ ဖုန်းကိုခေါက်ထားချိန်မှာ ၈.၉ မီလီမီတာထူပြီး ဖြန့်ထားချိန်မှာတော့ ၄.၂ မီလီမီတာပဲ ထူပါတယ်။
အဲဒီပါးလွှာမှုဟာ Honor Magic V5 နဲ့ vivo X Fold5 လိုမျိုး နောက်ဆုံးပေါ် တရုတ်ခေါက်ဖုန်းတွေနဲ့ တန်းတူဖြစ်သွားတာကြောင့် Samsung အနေနဲ့ ဒီကိစ္စမှာ နောက်ဆုံးတော့ ယှဉ်ပြိုင်နိုင်ပြီ ဖြစ်ပါတယ်။
ဒါပေမဲ့ Z Fold7 ဟာ ပါးလွှာပြီး ပေါ့ပါးတဲ့ ခေါက်ဖုန်းတစ်ခုမျှသာ မဟုတ်ဘဲ ဒီစီးရီးထဲမှာ အကြီးဆုံး မျက်နှာပြင်တွေကိုလည်း ပိုင်ဆိုင်ထားပါတယ်။ အတွင်းဘက် ပင်မမျက်နှာပြင်က ၈.၀ လက်မ ရှိလာပြီး အပြင်ဘက် မျက်နှာပြင်ကတော့ ၆.၅ လက်မ ရှိပါတယ်။ ပိုအရေးကြီးတာက အပြင်ဘက်မျက်နှာပြင်ဟာ ပိုကျယ်တဲ့ 21:9 aspect ratio ကို သုံးထားလို့ စာရိုက်တာနဲ့ တခြားအထွေထွေအသုံးပြုမှုတွေအတွက် ပိုအဆင်ပြေစေမှာ ဖြစ်ပါတယ်။
မျက်နှာပြင်နှစ်ခုလုံးကတော့ 1-120Hz refresh rate အထိ ပြောင်းလဲနိုင်တဲ့ Dynamic AMOLED 2x အမျိုးအစားကိုပဲ ဆက်သုံးထားပြီး အလင်းအား 2,600 nits အထိ ရရှိနိုင်ပါတယ်။ အပြင်ဘက်မျက်နှာပြင်ကို Gorilla Glass Ceramic 2 နဲ့ ကာကွယ်ပေးထားပြီး 10MP ဆယ်လ်ဖီကင်မရာတစ်လုံး ပါဝင်ပါတယ်။
အတွင်းဘက် ၈.၀ လက်မ မျက်နှာပြင်ပေါ်မှာတော့ Samsung က အရင်ကထက် ၅၀% ပိုထူတဲ့ Ultra-Thin Glass (UTG) မျိုးဆက်သစ်ကို အသုံးပြုထားပါတယ်။ Samsung ဟာ ပင်မမျက်နှာပြင်ပေါ်က မျက်နှာပြင်အောက် ကင်မရာစနစ်ကို ဖယ်ရှားလိုက်ပြီး ပုံမှန်သုံးနေကျ 10MP punch-hole ကင်မရာကိုပဲ ပြန်သုံးထားပါတယ်။ မကောင်းတဲ့အချက်က S Pen သုံးလို့ရတဲ့စနစ်ကိုလည်း ဖြုတ်ချသွားခဲ့ပါတယ်။
Fold7 ဟာ ရေနဲ့ဖုန်ဒဏ်ကို ခံနိုင်တဲ့ IP48 အဆင့်သတ်မှတ်ချက်ကိုတော့ ဆက်လက်ထိန်းသိမ်းထားပါတယ်။ ဖုန်းရဲ့ကျောဘက်ကိုတော့ Gorilla Glass Victus 2 နဲ့ ကာကွယ်ပေးထားပါတယ်။
ကင်မရာတွေအကြောင်း ဆက်ပြောရရင် Samsung ဟာ အဓိကကင်မရာအတွက် 200MP sensor (ISOCELL HP2) ကို ထည့်သွင်းပေးထားပြီး ဒါဟာ S25 Ultra မှာသုံးထားတဲ့ sensor နဲ့ တူညီပါတယ်။ ဒီကင်မရာဟာ f/1.7 aperture နဲ့ OIS စနစ်ပါဝင်တဲ့ 1/1.3″ sensor ဖြစ်ပါတယ်။ သူ့အပြင် 10MP 3x telephoto မှန်ဘီလူးနဲ့ 12MP ultrawide မှန်ဘီလူးအသစ်တို့လည်း ပါဝင်လာပါတယ်။
Chipset ပိုင်းမှာတော့ အထူးတလည် အံ့အားသင့်စရာမရှိဘဲ Samsung ဟာ Snapdragon 8 Elite for Galaxy ကိုပဲ အသုံးပြုထားပါတယ်။ RAM 12GB ဒါမှမဟုတ် 16GB နဲ့ storage 256GB/512GB ဒါမှမဟုတ် 1TB ဆိုပြီး ရွေးချယ်နိုင်မှာ ဖြစ်ပါတယ်။ Fold7 ဟာ Wi-Fi 7 နဲ့ Bluetooth 5.4 စနစ်အသစ်တွေကို ထောက်ပံ့ပေးထားလို့ ကွန်ရက်ချိတ်ဆက်မှုပိုင်းမှာတော့ တိုးတက်မှုတွေ ရှိလာပါတယ်။
ဆော့ဖ်ဝဲလ်ပိုင်းကိုတော့ Android 16 အခြေခံ One UI 8 မောင်းထားပြီး Galaxy AI စနစ်အပြည့်အစုံ ပါဝင်လာပါတယ်။ Samsung ဟာ Android OS အဆင့်မြှင့်တင်မှု ၇ ကြိမ်နဲ့ လုံခြုံရေးဆိုင်ရာ အဆင့်မြှင့်တင်မှု ၇ နှစ်အထိ အာမခံပေးထားပါတယ်။ Fold7 သုံးစွဲသူတွေဟာ Google ရဲ့ AI Pro ကို ၆ လစာ အခမဲ့ ရရှိမှာ ဖြစ်ပါတယ်။
Samsung ဟာ Fold7 မှာ အဆင့်မြှင့်တင်မှုတွေ အများကြီးလုပ်ပေးခဲ့ပေမယ့် ဘက်ထရီကတော့ 4,400mAh မှာပဲ ရှိနေသေးပြီး အရင်အတိုင်း 25W ကြိုးတပ်အားသွင်းစနစ်၊ 15W ကြိုးမဲ့အားသွင်းစနစ်နဲ့ 4.5W reverse wireless charging စနစ်တွေကိုပဲ ဆက်လက်အသုံးပြုထားပါတယ်။
Galaxy Z Fold7 ကို Blue Shadow, Silver Shadow, Jet Black နဲ့ Mint ဆိုတဲ့ အရောင်တွေနဲ့ ရရှိနိုင်မှာဖြစ်ပြီး Mint အရောင်ကိုတော့ Samsung.com မှာပဲ သီးသန့်ရောင်းချသွားမှာ ဖြစ်ပါတယ်။
အနိမ့်ဆုံး 12/256GB မော်ဒယ်ကို ဒေါ်လာ ၂,၀၀၀/ ယူရို ၂,၁၀၀/ ပေါင် ၁,၈၀၀ ကနေ စတင်ရောင်းချမှာ ဖြစ်ပြီး အမြင့်ဆုံး 16GB RAM နဲ့ 1TB storage မော်ဒယ်ကိုတော့ ဒေါ်လာ ၂,၄၂၀/ ယူရို ၂,၅၂၀/ ပေါင် ၂,၁၀၀ နဲ့ ရောင်းချသွားမှာပါ။
အခုပဲ ကြိုတင်မှာယူလို့ရနေပြီဖြစ်ပြီး တရားဝင်ရောင်းချမှုကိုတော့ ဇူလိုင်လ ၂၅ ရက်နေ့မှာ စတင်မှာ ဖြစ်ပါတယ်။
Ref: gsmarena
