Stanford ဆေးတက္ကသိုလ်နဲ့ North Texas တက္ကသိုလ်က သိပ္ပံပညာရှင်တွေဟာ ကိုယ်ပိုင်သွေးကြောတွေပါဝင်တဲ့ ပထမဆုံး ဓာတ်ခွဲခန်းထုတ် နှလုံးနဲ့ အသည်း အင်္ဂါပုံစံငယ်လေးတွေကို ဖန်တီးလိုက်နိုင်ပြီ ဖြစ်ပါတယ်။
သုတေသနအဖွဲ့ဟာ အဲဒီ “အင်္ဂါငယ်လေးတွေ” ကို လူသားပင်မဆဲလ်တွေကနေ မွေးမြူခဲ့တာဖြစ်ပြီး condition 32 လို့ခေါ်တဲ့ အထူးဖော်စပ်နည်းကို အသုံးပြုခဲ့ပါတယ်။ အဲဒီဖော်စပ်နည်းက ခုန်နေတဲ့ နှလုံးဆဲလ်တွေ၊ ချောမွေ့တဲ့ ကြွက်သားတွေနဲ့ သွေးကြောခွဲတွေကို ဖြစ်ပေါ်လာစေနိုင်ခဲ့ပါတယ်။
အဏုကြည့်မှန်ဘီလူးအောက်မှာ ကြည့်လိုက်တဲ့အခါ နှလုံးအင်္ဂါငယ်လေးတွေဟာ တကယ့်လူသားတွေရဲ့ သွေးကြောမျှင်တွေနဲ့ အရွယ်အစားတူတဲ့ သွေးကြောမျှင်လေးတွေပါတဲ့ လက်စွပ်ပုံစံတွေ ဖြစ်ပေါ်လာတာကို တွေ့ခဲ့ရပါတယ်။ အဲဒီနည်းလမ်းကိုပဲ အသုံးပြုပြီး သုတေသီတွေဟာ ခိုင်မာတဲ့ သွေးကြောကွန်ရက်တွေပါတဲ့ အသည်းအင်္ဂါငယ်လေးတွေကိုလည်း မွေးမြူနိုင်ခဲ့ပါတယ်။
၁၆ ရက်အကြာမှာ အဲဒီနှလုံးငယ်လေးတွေဟာ သက်တမ်း ၆ ပတ်ခွဲအရွယ် လူသားသန္ဓေသားရဲ့ နှလုံးမှာရှိတဲ့ ဆဲလ်အမျိုးအစား အရေအတွက်လောက် ရှိနေပြီး အဲဒီအချိန်မှာ နှလုံးခုန်နေပြီ ဖြစ်ပါတယ်။
အခုလက်ရှိမှာ အဲဒီအင်္ဂါငယ်လေးတွေက အင်္ဂါအပြည့်အစုံ မဟုတ်သေးပေမဲ့ သုတေသီတွေက သူတို့ကို အချိန်ပိုကြာကြာ မွေးမြူပြီး ပိုပြီးရင့်ကျက်လာအောင် လုပ်ဆောင်သွားဖို့ ရည်ရွယ်ထားပါတယ်။ အဲဒီလိုလုပ်ဆောင်ခြင်းအားဖြင့် အရွယ်ရောက်ပြီးသား နှလုံးနဲ့ အသည်းပုံစံတွေနဲ့ ပိုပြီး နီးစပ်လာစေမှာ ဖြစ်ပါတယ်။
ref : Technology Innovation
