အိန္ဒိယနိုင်ငံ ဘင်ဂါလာရူး မှာနေထိုင်တဲ့ အသက် ၄၃ နှစ်အရွယ် software engineer တစ်ယောက်အတွက် ရူပီး ၁.၈၆ သိန်းတန် မိုဘိုင်းဖုန်းအသစ်တစ်လုံး မှာယူခဲ့ပေမယ့် အိပ်မက်ဆိုးတစ်ခုအဖြစ် ပြောင်းလဲသွားခဲ့ပါတယ်။ သူဟာ မှာယူထားတဲ့ ဈေးကြီးတဲ့ Samsung ဖုန်းအစား ထုတ်ကုန်ဘူးထဲမှာ အုတ်ကြွပ်ပြားတစ်ပြားကို တွေ့ရှိခဲ့ရလို့ပါပဲ။
Premanand က ရဲစခန်းမှာ အမှုဖွင့်တိုင်ကြားခဲ့ပြီး ရဲတပ်ဖွဲ့က BNS ပုဒ်မ ၃၁၈(၄) (လိမ်လည်မှု)၊ ၃၁၉ (ဟန်ဆောင်လိမ်လည်မှု) နဲ့ Information Technology (IT) အက်ဥပဒေရဲ့ ပုဒ်မ ၆၆ဒီ (ကွန်ပျူတာ အရင်းအမြစ်ကိုသုံးပြီး ဟန်ဆောင်လိမ်လည်မှု) တွေနဲ့ အမှုဖွင့် (FIR) မှတ်တမ်းတင်ခဲ့ပါတယ်။
Premanand က ရဲတွေကို ပြောပြရာမှာ သူဟာ အောက်တိုဘာ ၁၄ ရက်နေ့က Amazon ကနေ Samsung Galaxy Z Fold 7 တစ်လုံးကို ရူပီး ၁.၈၆ သိန်းနဲ့ မှာယူခဲ့တယ်လို့ ဆိုပါတယ်။
သူက သူ့ရဲ့ credit card ကနေ online မှာပဲ ငွေပေးချေခဲ့ပြီး မှာယူမှုအသေးစိတ် (order details) နဲ့ ပစ္စည်းခြေရာခံ သတင်းအချက်အလက် (tracking information) တွေကို လက်ခံရရှိခဲ့တယ်လို့ အမှုဖွင့်မှတ်တမ်း (FIR) မှာ ဖော်ပြထားပါတယ်။
အောက်တိုဘာ ၁၉ ရက်နေ့ ညနေ ၄ နာရီ ၁၆ မိနစ်မှာ ပစ္စည်းပါဆယ် ရောက်လာခဲ့ပါတယ်။ Premanand က (သက်သေအနေနဲ့) ဗီဒီယိုရိုက်ကူးရင်း ပါဆယ်ဘူးကို ဖွင့်ကြည့်လိုက်တဲ့အခါမှာတော့ ဖုန်းဘူးထဲမှာ လေးထောင့်ပုံ အဖြူရောင် အုတ်ကြွပ်ပြားတစ်ပြားကိုသာ တွေ့ရှိခဲ့ရပါတယ်။
လိမ်လည်ခံရသူက ပထမဆုံး National Cybercrime Reporting Portal (NCRP) ကို တိုင်ကြားခဲ့ပြီးနောက် အမှုဖွင့် (FIR) မှတ်တမ်းတင်နိုင်ဖို့အတွက် အောက်တိုဘာ ၁၉ ရက်နေ့မှာပဲ ရဲစခန်းကို သွားရောက်ခဲ့တာ ဖြစ်ပါတယ်။ လက်ရှိမှာတော့ စုံစမ်းစစ်ဆေးမှုတွေ လုပ်ဆောင်နေပါတယ်။
Ref : deccanherald
