တောင်ကိုရီးယားနိုင်ငံ၊ ဆိုးလ်အမျိုးသားတက္ကသိုလ် (SNU) က ပါမောက္ခ Seung Hwan Ko ဦးဆောင်တဲ့ အဖွဲ့ဟာ အရေပြားပေါ်မှာ ပလာစတာတစ်ခုလို ကပ်ထားရုံနဲ့ သွေးပေါင်ချိန်ကို အချိန်နဲ့တပြေးညီ စောင့်ကြည့်နိုင်မယ့် အီလက်ထရောနစ်ပစ္စည်းအသစ်တစ်ခုကို အောင်မြင်စွာ တီထွင်လိုက်ပြီဖြစ်ကြောင်း ကြေညာခဲ့ပါတယ်။
လက်ရှိအသုံးပြုနေတဲ့ လက်မောင်းမှာပတ်ပြီး လေဖြည့်တိုင်းတာရတဲ့ သွေးပေါင်ချိန်တိုင်းကိရိယာတွေနဲ့မတူဘဲ၊ ဒီနည်းပညာသစ်ဟာ သေးငယ်ပြီး ပျော့ပျောင်းတဲ့ အီလက်ထရောနစ်ပြား (patch) တစ်ခုကို အသုံးပြုထားပါတယ်။
ဒီပစ္စည်းကို လက်ကောက်ဝတ်မှာ ကပ်ထားရုံနဲ့ သွေးပေါင်ချိန်ပြောင်းလဲမှုတွေကို အချိန်မရွေး၊ နေရာမရွေး စောင့်ကြည့်နိုင်မှာဖြစ်ပါတယ်။ ဒီကိရိယာဟာ မူလအလျားရဲ့ ၇၀၀% အထိ ဆွဲဆန့်တာနဲ့ အကြိမ် ၁၀,၀၀၀ ကျော် ဆွဲဆန့်တာတွေကို ခံနိုင်ရည်ရှိပါတယ်။ အထူးသဖြင့် “တိတ်တိတ်လေးသတ်နေတဲ့ လူသတ်သမား” လို့ တင်စားခေါ်ဝေါ်ကြတဲ့ သွေးတိုးရောဂါလို နာတာရှည်ရောဂါရှိသူတွေအတွက် သူတို့ရဲ့လက်ရှိအခြေအနေကို စဉ်ဆက်မပြတ်စောင့်ကြည့်နိုင်တာကြောင့် အလွန်အသုံးဝင်တဲ့ နည်းပညာတစ်ခု ဖြစ်လာမှာပါ။
ပါမောက္ခ Seung Hwan Ko က “ဒီသုတေသနဟာ သွေးပေါင်ချိန်တိုင်းတာရတာ အဆင်မပြေဘူး၊ တစ်နေ့တစ်ကြိမ်တိုင်းရင် လုံလောက်ပြီဆိုတဲ့ အယူအဆဟောင်းကို စိန်ခေါ်လိုက်တာပါ။ ဒီနည်းပညာဟာ အထူးကြပ်မတ်ကုသဆောင်တွေမှာ လူနာစောင့်ကြည့်တာ အပါအဝင် နယ်ပယ်များစွာမှာ အသုံးဝင်တဲ့ ကိရိယာတစ်ခု ဖြစ်လာနိုင်ပါတယ်” လို့ ပြောကြားခဲ့ပါတယ်။
Ref : Interesting Engineering
