Las Vegas မှာ ကျင်းပနေတဲ့ CES 2026 ပွဲမှာ Jackery က အမိုက်စား စက်ရုပ်လေး တစ်ကောင်ကို ပြသလိုက်ပါတယ်။ သူက ရိုးရိုး Power Bank အကြီးစားကြီး မဟုတ်ပါဘူး။ ကိုယ့်နောက်ကို တကောက်ကောက်လိုက်ပြီး လိုအပ်တဲ့ လျှပ်စစ်မီး လိုက်ဖြည့်ပေးမယ့် စက်ရုပ် “ဘတ္တလာ” (Robot Butler) လေး ဖြစ်ပါတယ်။
ဒီ Solar Mars Bot ရဲ့ အကြမ်းဆုံးအချက်ကတော့ “နေရောင်ခြည်ကို မျက်ခြေမပြတ် လိုက်ရှာနိုင်တာ” ပါပဲ။ ပုံမှန် ဆိုလာပြားတွေလို တစ်နေရာတည်း အသေတပ်ထားပြီး နေရောင်ပျောက်သွားရင် ထိုင်စောင့်နေစရာ မလိုပါဘူး။ AI နည်းပညာ ပါဝင်တဲ့အတွက် အိမ်ခြံဝင်းထဲမှာပဲဖြစ်ဖြစ်၊ တောထဲမှာပဲဖြစ်ဖြစ် နေရောင်အကောင်းဆုံးရမယ့် နေရာကို သူ့ဘာသာ လှည့်လည်ရှာဖွေပြီး အားသွင်းနိုင်ပါတယ်။ ဥပမာ- သစ်ပင်ရိပ်ကျလာရင် နေပူတဲ့နေရာကို သူ့ဘာသာ ရွှေ့သွားမှာပါ။
အတောင်ပံလို ခေါက်သိမ်းထားတဲ့ ဆိုလာပြားတွေကို ဖြန့်လိုက်မယ်ဆိုရင် 600 watts အထိ စွမ်းအင်ထုတ်ပေးနိုင်ပါတယ်။ စခန်းချခရီးထွက်တာပဲဖြစ်ဖြစ်၊ အိမ်မှာ မီးပျက်တာပဲဖြစ်ဖြစ် လိုအပ်တဲ့ လျှပ်စစ်ပစ္စည်းတွေကို ဒီစက်ရုပ်က တရွေ့ရွေ့ လိုက်လံအားသွင်းပေးနေမှာပါ။
ရာသီဥတုဒဏ် ခံနိုင်အောင် ဖန်တီးထားပြီး 4G/5G ကွန်ရက်နဲ့ ချိတ်ဆက်ထားလို့ ကိုယ့်ဖုန်းထဲက App ကနေတဆင့် စက်ရုပ် ဘယ်ရောက်နေလဲ၊ ဘက်ထရီ ဘယ်လောက်ကျန်လဲဆိုတာကို လှမ်းကြည့်လို့ရပါသေးတယ်။ ဒါကြောင့် Solar Mars Bot ဟာ နေရောင်ရှိရင် အလိုလို အားပြည့်နေမယ့် အနာဂတ်ရဲ့ ခရီးဆောင် မီးစက်ပုံစံသစ် ဖြစ်လာဖို့ ရှိနေပါတယ်။
Ref : gizmochina
