တရုတ်နိုင်ငံ ဟန်ကျိုးအခြေစိုက် Unitree Robotics ကုမ္ပဏီဟာ အမေရိကန်ဒေါ်လာ ၅,၉၀၀ ဝန်းကျင်သာ ကျသင့်မယ့် R1 အမည်ရှိ လူတူစက်ရုပ်အသစ်ကို မိတ်ဆက်လိုက်ပြီး၊ လူတူစက်ရုပ်ဈေးကွက်မှာ ကြီးမားတဲ့ ဈေးနှုန်းစစ်ပွဲတစ်ခုကို စတင်လိုက်ပါတယ်။ ကုမ္ပဏီက ထုတ်ပြန်တဲ့ ဗီဒီယိုတွေမှာ ဒီစက်ရုပ်ဟာ ကျွမ်းဘားကစားသလို လှုပ်ရှားတာ၊ တောင်စောင်းပေါ်ကနေ ပြေးဆင်းတာ၊ လဲကျရာကနေ အမြန်ပြန်ထနိုင်တာလိုမျိုး အဆင့်မြင့်လှုပ်ရှားမှုတွေကို ပြုလုပ်ပြခဲ့ပါတယ်။
ဈေးကွက်ကို ပြောင်းလဲစေမယ့် ဈေးနှုန်း
R1 ရဲ့ အဓိကထူးခြားချက်ကတော့ သူ့ရဲ့ဈေးနှုန်းပါပဲ။ အခုလို အဆင့်မြင့်လှုပ်ရှားမှုတွေ လုပ်ဆောင်နိုင်တဲ့ စက်ရုပ်တွေဟာ အရင်က ဒေါ်လာသောင်းချီကနေ သိန်းချီအထိ ဈေးနှုန်းရှိခဲ့ပါတယ်။ ဥပမာအားဖြင့် Tesla ရဲ့ Optimus စက်ရုပ်က ဒေါ်လာ ၂၀,၀၀၀ အောက်၊ Figure AI နဲ့ Apptronik တို့ရဲ့ စက်ရုပ်တွေက ဒေါ်လာ ၅၀,၀၀၀ ဝန်းကျင် အသီးသီးရှိနေချိန်မှာ Unitree ရဲ့ R1 က ဒေါ်လာ ၆,၀၀၀ အောက် ဈေးနှုန်းနဲ့ ပွဲထွက်လာတာ ဖြစ်ပါတယ်။ ဒီစက်ရုပ်ကို သာမန်ဝါသနာရှင်တွေအတွက်မဟုတ်ဘဲ၊ ဆော့ဖ်ဝဲရေးဆွဲသူတွေ (Developers) နဲ့ သုတေသနအဖွဲ့ငယ်တွေအတွက် ရည်ရွယ်ထုတ်လုပ်ထားတာဖြစ်ပြီး၊ ကုမ္ပဏီရဲ့ အဆင့်မြင့်စက်ရုပ်တွေမှာသုံးတဲ့ နည်းပညာကို ဈေးသက်သက်သာသာနဲ့ လက်လှမ်းမီစေမှာ ဖြစ်ပါတယ်။
စက်ရုံသုံးကနေ IPO အထိ
Unitree ရဲ့ ဈေးပိုကြီးတဲ့ H1 နဲ့ G1 စက်ရုပ်တွေကို တရုတ်နိုင်ငံရဲ့ လျှပ်စစ်ကားထုတ်လုပ်ရေးကုမ္ပဏီတွေဖြစ်တဲ့ Nio နဲ့ Geely တို့ရဲ့ စက်ရုံတွေမှာ လက်ရှိစမ်းသပ်အသုံးပြုနေပြီ ဖြစ်ပါတယ်။ R1 ကတော့ အဲဒီလိုစက်မှုလုပ်ငန်းသုံး ဆော့ဖ်ဝဲတွေရေးဆွဲဖို့အတွက် တံခါးဖွင့်ပေးမယ့် ဈေးသက်သာတဲ့ ပလက်ဖောင်းတစ်ခု ဖြစ်လာမှာပါ။
ဒီ R1 စက်ရုပ်ကို မိတ်ဆက်လိုက်တဲ့အချိန်ဟာ Unitree ကုမ္ပဏီက တရုတ်နိုင်ငံမှာ ကနဦးအစုရှယ်ယာထုတ်ဝေရောင်းချခြင်း (IPO) ပြုလုပ်ဖို့ စာရွက်စာတမ်းတွေ တင်သွင်းပြီး ရက်ပိုင်းအတွင်းမှာပဲ ဖြစ်ပွားခဲ့တာကြောင့် ပိုပြီးစိတ်ဝင်စားစရာကောင်းနေပါတယ်။ အောင်မြင်ခဲ့မယ်ဆိုရင် Unitree ဟာ တရုတ်ပြည်မကြီးရဲ့ စတော့အိတ်ချိန်းမှာ စာရင်းဝင်တဲ့ ပထမဆုံး လူတူစက်ရုပ်သီးသန့်ထုတ်လုပ်တဲ့ ကုမ္ပဏီ ဖြစ်လာနိုင်ပါတယ်။ ဒီခြေလှမ်းဟာ လူတူစက်ရုပ်နည်းပညာ ဖွံ့ဖြိုးတိုးတက်မှုကို အရှိန်အဟုန်မြှင့်တင်ပေးနိုင်တဲ့ အရေးပါတဲ့ ဖြစ်ရပ်တစ်ခုအဖြစ် သုံးသပ်နေကြပါတယ်။
Ref : interestingengineering
