Visa က ဒစ်ဂျစ်တယ် အနုပညာ လောကကို ထောက်ပံ့ဖို့အတွက် Non-fungible Token(NFT) Program ကို ပြုလုပ်ပေးလိုက်ပါတယ်။ ငွေကြေးလွှဲပြောင်းတဲ့ ဝန်ဆောင်မှု ပေးနေတဲ့ ကုမ္ပဏီကြီး Visa က ယခင် Major League Baseball ကစားသမား အဖြစ်ကနေ NFT အနုပညာရှင် ဖြစ်လာတဲ့ Micah Johnson နဲ့ ပူးပေါင်းပြီး အဲဒီ Program ကို ဖန်တီးမှာ ဖြစ်ပါတယ်။ Visa ရဲ့ Program မှာ ဒစ်ဂျစ်တယ် အနုပညာရှင်တွေက NFTs တွေကို အရောင်းအဝယ်ပြုလုပ်နိုင်မှာပါ။
Visa က လျှောက်လွှာကနေ တစ်ဆင့် ဒစ်ဂျစ်တယ် အနုပညာရှင် အနည်းငယ်ကို ရွေးချယ်မှာ ဖြစ်ပြီး Crypto နဲ့ Blockchain နည်းပညာ အကြောင်း သူတို့ကို သင်ကြားပေးမှာ ဖြစ်ပါတယ်။ Visa ရဲ့ Crypto ဌာန အကြီးအကဲ Cuy Sheffield က “ ကျွန်တော်တို့ဟာ ဒစ်ဂျစ်တယ် အနုပညာ ကမ္ဘာရဲ့ အစပိုင်းကို ရောက်လာပြီလို့ ယုံကြည်ပါတယ်။ NFTs လို Crypto Ecosystem တွေ အောင်မြင်လာအောင် ပြုလုပ်ပေးတဲ့ နည်းပညာ အသစ်တွေက ဒစ်ဂျစ်တယ် အနုပညာရှင်တွေအတွက် အလားအလာကောင်းတွေ ဖန်တီးပေးနိုင်လာပါတယ်။ အဲဒီ ဒစ်ဂျစ်တယ် အနုပညာရှင်တွေဟာ ကိုယ်ပိုင် လုပ်ငန်းငယ်တွေ ထူထောင်လာနိုင်မှာပါ။ “ လို့ တွစ်တာမှာ ရေးသားထားပါတယ်။
ပြီးခဲ့တဲ့ လတွေအတွင်းမှာ NFTs ဈေးကွက်များစွာ ပေါ်လာပါတယ်။ ပြီးခဲ့တဲ့ အင်္ဂါနေ့မှာ Cryptocurrency အရောင်းအဝယ် ပြုလုပ်နေတဲ့ Coinbase က NFTs ဈေးကွက်ကို တည်ထောင်တဲ့ နောက်ဆုံး အဖွဲ့အစည်း ဖြစ်လာပါတယ်။ ဒေတာ လေ့လာဆန်းစစ်တဲ့ DappRadar Company က တတိယကွာတားအတွင်း NFTs ဈေးကွက်မှာ ဒေါ်လာ ၁၀ ဘီလီယမ်ဖိုး ရောင်းချနိုင်ခဲ့တယ်လို့ ပြောပါတယ်။
Aku ကို ဖန်တီးတဲ့ Johnson က ၂၀၂၀ မှာ ဒစ်ဂျစ်တယ် အနုပညာ လောကထဲ ဝင်လာပါတယ်။ Aku ကို ၂၀၂၁ ဖေဖော်ဝါရီလမှာ စတင် ဖြန့်ချိခဲ့ပြီး ၂၄ နာရီအတွင်း NFTs Token ပေါင်း ဒေါ်လာ ၂ သန်းကျော်ဖိုး ရောင်းချနိုင်ခဲ့ပါတယ်။ Johnson က “ Visa နဲ့ ပူးပေါင်းလိုက်တဲ့အတွက် အနုပညာရှင်တွေလိုအပ်တဲ့ အရင်းအမြစ်တွေကို ထောက်ပံ့ပေးနိုင်မှာပါ။ “ လို့ ပြောပါတယ်။
Ref : coindesk