ဂျပန်နိုင်ငံမှာ ကမ္ဘာ့ပထမဆုံး မောင်းသူမဲ့ ခရီးသည်တင်သင်္ဘော စတင်ပြေးဆွဲ

ဂျပန်နိုင်ငံ Okayama ခရိုင် Shin-Okayama ဆိပ်ကမ်းနဲ့ Shodoshima ကျွန်း Tonosho ဆိပ်ကမ်းကြားမှာ ပြေးဆွဲမယ့် ကမ္ဘာ့ပထမဆုံး မောင်းသူမဲ့ ခရီးသည်တင်သင်္ဘော “Olympia Dream Seto” ကို ဒီဇင်ဘာ ၁၁ ရက်မှာ စတင်ပြေးဆွဲလိုက်ပါတယ်။ Ryobi Holdings နဲ့ Nippon Foundation တို့ ပူးပေါင်းဆောင်ရွက်ထားတဲ့ အဲဒီ သင်္ဘောဟာ အာရုံခံကိရိယာ (Sensors) တွေ အသုံးပြုပြီး အတားအဆီးတွေကို အလိုအလျောက် ရှောင်ကွင်းမောင်းနှင်နိုင်သလို ဆိပ်ကမ်းကပ်တာနဲ့ ထွက်ခွာတာတွေကိုလည်း လူအကူအညီမပါဘဲ လုပ်ဆောင်နိုင်စွမ်း ရှိပါတယ်။

အဲဒီ သင်္ဘောဟာ အလျား ၈၅ မီတာခန့် ရှည်လျားပြီး ခရီးသည် ၅၀၀ ဦးနဲ့ မော်တော်ယာဉ် အစီး ၆၀ ခန့်ကို တင်ဆောင်နိုင်ပါတယ်။ ဂျပန်နိုင်ငံမှာ ကြုံတွေ့နေရတဲ့ သင်္ဘောသား လုပ်သားရှားပါးမှု ပြဿနာကို ဖြေရှင်းဖို့နဲ့ လူကြောင့်ဖြစ်တဲ့ အမှားအယွင်းတွေကို လျှော့ချဖို့ ရည်ရွယ်ထားတဲ့ ဒီစီမံကိန်းဟာ ရေကြောင်းပို့ဆောင်ရေးကဏ္ဍအတွက် အရေးပါတဲ့ ခြေလှမ်းသစ်တစ်ခု ဖြစ်ပါတယ်။ လက်ရှိမှာတော့ ဘေးကင်းလုံခြုံရေးအတွက် စောင့်ကြည့်မယ့် ဝန်ထမ်းတွေ လိုက်ပါစီးနင်းဦးမှာ ဖြစ်ပေမယ့် အပြည့်အဝ မောင်းသူမဲ့စနစ်ကို မကြာခင်မှာ အကောင်အထည်ဖော်သွားဖို့ ရှိနေပါတယ်။