Xiaomi ဟာ 17 series ကို ဒီလနှောင်းပိုင်းမှာ ပြသဖို့ ပြင်ဆင်နေပြီး အဲဒီမတိုင်ခင်မှာပဲ ကုမ္ပဏီရဲ့ ဥက္ကဋ္ဌဖြစ်တဲ့ Lu Weibing က Weibo မှာ Xiaomi 17 Pro Max နဲ့ iPhone 17 Pro Max တို့ကို နှိုင်းယှဉ်ပြသခဲ့ပါတယ်။ အောက်က ဗီဒီယိုအတိုလေးထဲမှာ သူကိုယ်တိုင် အဲဒီဖုန်းနှစ်လုံးကို ကိုင်တွယ်ပြသထားတာကို တွေ့မြင်နိုင်ပါတယ်။
ဒီလိုလုပ်ရတဲ့ ရည်ရွယ်ချက်က Xiaomi ဟာ Apple ဆီကနေ ကင်မရာ island ဒီဇိုင်းကို ကူးချထားတယ်ဆိုတဲ့ လူတွေရဲ့ စိုးရိမ်မှုတွေကို ပြေလျော့စေဖို့ဖြစ်ပြီး သူ အဓိကပြောချင်တာကတော့ အဲဒီဖုန်းနှစ်လုံး ဘယ်လောက်ကွဲပြားတယ်ဆိုတာကို တွေ့နိုင်တယ်ဆိုတာပါပဲ။ ဒါပေမဲ့ Xiaomi ရဲ့ island နေရာကို နေရာယူထားတဲ့ screen ကို လျစ်လျူရှုလိုက်မယ်ဆိုရင်တော့ အရမ်းကြီး ကွဲပြားခြားနားတာကို သိပ်မတွေ့ရပါဘူး။
Xiaomi ကတော့ အဲဒီဒီဇိုင်းဟာ ၂၀၂၁ ခုနှစ်က Mi 11 Ultra ကို အတုယူထားတာလို့ပြောပါတယ်။ အလားတူပဲ ကုမ္ပဏီက Apple ရဲ့ နာမည်ပေးပုံစံနဲ့ တိုက်ဆိုင်သွားအောင် 16 generation ကို ကျော်သွားတာ မဟုတ်ဘူးလို့ အခိုင်အမာ ပြောနေတာဟာ သူတို့ကိုယ်တိုင်လည်း “Pro Max” ဆိုတဲ့ နာမည်ကို ယူသုံးထားတာကို ထည့်စဉ်းစားရင် တော်တော်လေး အဓိပ္ပာယ်မရှိတဲ့ အချက် ဖြစ်ပါတယ်။
Lu က 17 series ကို တရုတ်နိုင်ငံမှာ အောက်တိုဘာ ၁ ရက်နေ့ မတိုင်ခင် ရောင်းချပေးသွားမှာဖြစ်ပြီး အဲဒီဖုန်းတွေဟာ စက်တင်ဘာ ၂၃ ရက်နေ့မှာ ကြေညာမယ့် Qualcomm ရဲ့ Snapdragon 8 Elite Gen 5 SoC ကို ပထမဆုံး သုံးထားတဲ့ ဖုန်းတွေဖြစ်လာမယ်လို့လည်း အတည်ပြုပြောကြားခဲ့ပါတယ်။ Xiaomi ဟာ အဲဒီ chip အတွက် ပုံမှန်ထက် ပိုကြာတဲ့ တစ်ဦးတည်းမူပိုင် သုံးစွဲခွင့်ကာလကိုလည်း ရယူထားနိုင်ခဲ့တာကြောင့် အောက်တိုဘာလ မတိုင်ခင်မှာ ဘယ်ပြိုင်ဘက် ပစ္စည်းမှ ထွက်ရှိလာဖို့ မမျှော်လင့်နိုင်ပါဘူး။
Xiaomi 17 Pro ကို ဈေးနှုန်း ယွမ် ၅,၀၀၀ နဲ့ ၆,၀၀၀ ကြား (ဒေါ်လာ ၇၀၀ ကနေ ၈၅၀) သတ်မှတ်ထားမှာဖြစ်ပြီး Pro Max ကိုတော့ ယွမ် ၆,၀၀၀ နဲ့ ၇,၀၀၀ ကြား (ဒေါ်လာ ၈၅၀ ကနေ ၁,၀၀၀) သတ်မှတ်ထားမှာ ဖြစ်ပါတယ်။ ဒါတွေကတော့ တရုတ်ဈေးကွက်ရဲ့ ဈေးနှုန်းတွေဖြစ်ပြီး အဲဒီဖုန်းနှစ်မျိုးကို နိုင်ငံတကာမှာ ရောင်းချခဲ့မယ်ဆိုရင် ဈေးနှုန်း ပိုများလာမယ်လို့ မျှော်လင့်ထားနိုင်ပါတယ်။
Ref: gsmarena
