Apple ဟာ ထုတ်ကုန် အသစ်တွေကို စဉ်ဆက်မပြတ် ဖန်တီးနေပြီး တချို့ကို အတွင်းပိုင်း အစိတ်အပိုင်းတွေပဲ ပြောင်းလဲကာ ရောင်းချနေသလို တချို့ကိုလည်း ဒီဇိုင်း ဆန်းသစ်ကာ ရောင်းချနေကြပါတယ်။ အခုလည်း Apple နောက်ထုတ်မယ့် iPad Mini 6 ရဲ့ ဓါတ်ပုံ ပေါက်ကြားထွက်ပေါ်လာပြီး ဒီဇိုင်း အသစ် သုံးထားတာ မြင်ရပါတယ်။ စိတ်ဝင်စားစရာကောင်းတဲ့ လုပ်ဆောင်ချက်တွေလည်း ပါလာပါတယ်။
Apple iPad Mini 6 ရဲ့ သတင်းအချက်အလက်နဲ့ ဓါတ်ပုံကို မျှဝေလိုက်တာက David Kowalski ဖြစ်ပြီး သူက iPad Mini 6 မှာ မျက်နှာပြင်အောက် Touch ID လက်ဗွေရာ ကိရိယာမြှပ်နှံထားမယ်လို့ ပြောပါတယ်။ ဓါတ်ပုံမှာတော့ Touch ID ရဲ့ တည်နေရာကို Cutout နဲ့ သရုပ်ဖော်ပြသထားပါတယ်။
နောက်ထပ် လုပ်ဆောင်ချက်က ဆဲလ်ဖီး ကင်မရာကို Punch Hole မှာ ထည့်သွင်းထားတာပါ။ အဲဒီအတွက် မျက်နှာပြင်ဘေးဘောင်တွေ ပါးလွှာကာ Full Screen ဒီဇိုင်းက မိုက်ပါတယ်။
အရင်ကတော့ Apple အရေး လေ့လာဆန်းစစ်သူ Ming-Chi Kuo က iPad Mini 6 မှာ ၉.၁ လက်မ မျက်နှာပြင် ပါလာမယ်လို့ သတင်းပေးထားပါတယ်။ အရင်မျိုးဆက် iPad Mini Series တွေထက် မျက်နှာပြင် အရွယ်အစား ပိုကြီးလာမှာပါ။
iPad Mini 6 မှာ Apple A14 Chipset မောင်းနှင်ထားနိုင်ပြီး iPhone 12 Series က Chip တွေ ဖြစ်ပါတယ်။ တက်ဘလက် အသစ်ကို မတ်လမှာ iPad Pro 2021 , iPhone SE 2021 တို့နဲ့အတူ ကြေညာနိုင်ပါတယ်။
ref : gizmochina
