တရုတ်က အင်ဂျင်နီယာတွေဟာ ကမ္ဘာကြီးရဲ့ ဘယ်နေရာကို မဆို ခရီးသည်တွေကို ၁ နာရီအတွင်း ပို့ဆောင်ပေးနိုင်မယ့် အသံထက် မြန်တဲ့ လေယာဉ် ၁ စီးကို ဖန်တီးနေကြပါတယ်။ သုတေသန အဖွဲ့က အသံထက်မြန်တဲ့ အင်ဂျင် နမူနာမော်ဒယ်ကို စမ်းသပ်ခဲ့ကြပြီးပါပြီ။ အဲဒီ အင်ဂျင်ဟာ ၄၅ မီတာရှည်တဲ့ လေယာဉ်ကို အရမ်းမြန်တဲ့ နှုန်းနဲ့ မောင်းနှင်ပေးနိုင်ပြီး ခရီးသည် ၁၀ ယောက်အထိ လိုက်ပါစီးနင်းနိုင်မှာ ဖြစ်ပါတယ်။
နန်ဂျင်း တက္ကသိုလ်မှ ပါမောက္ခ Tan Huijun နဲ့ ပညာရှင် အဖွဲ့က အဲဒီ အင်ဂျင် ဒီဇိုင်းကို ဖန်တီးထားကြတာဖြစ်ပြီး Wind Tunnel ထဲမှာ စမ်းသပ်ပြီးပြီလို့ South China Morning Post က ရေးသားထားပါတယ်။ လေယာဉ်ဟာ အသံထက် ၅ ဆ မြန်တဲ့ နှုန်းနဲ့ ပျံသန်းနိုင်ပြီး NASA ရဲ့ အသံထက်မြန်တဲ့ လေယာဉ် စီမံကိန်းက ယခင် အကြီးအကဲ အင်ဂျင်နီယာ ဖြစ်သူ Ming Han Tang ရဲ့ ၁၉၉၀ ခုနှစ်က အိုင်ဒီယာကို အခြေပြု တည်ဆောက်ထားတာ ဖြစ်ပါတယ်။
The Two Stage Vehicle (TSV) X လေယာဉ်ရဲ့ ဘေးတစ်ဖက်တစ်ချက်မှာ အင်ဂျင် ၁ လုံးစီ တပ်ဆင်ထားပြီး အဲဒီ ဒီဇိုင်းကြောင့် လေယာဉ်ဟာ အရမ်းမြန်တဲ့ နှုန်းနဲ့ ပျံသန်းနိုင်တာ ဖြစ်ပါတယ်။ အဲဒီလို ဒီဇိုင်းမျိုးကို Boeing က ဖန်တီးခဲ့ဖူးပြီး ကုန်ကျစားရိတ် အရမ်းများကာ နည်းပညာ ပြဿနာတွေ ရှိတာကြောင့် ရပ်နားခဲ့ပါတယ်။
တရုတ်ဟာ ၂၀၃၅ ခုနှစ်မှာ ခရီးသည်တင်လေယာဉ်တွေ ပိုင်ဆိုင်ဖို့နဲ့ ၂၀၄၅ ခုနှစ်မှာ ခရီးသည် ၁၀၀ တင်ဆောင်နိုင်ဖို့ ရည်မှန်းထားပါတယ်။
အသံထက် မြန်တဲ့ လေယာဉ်တွေကို တခြားနိုင်ငံတွေကလည်း ဖန်တီးနေကြပါတယ်။ ပြီးခဲ့တဲ့ ဇူလိုင်လမှာ အမေရိကန် လေတပ်က အသံထက် ၅ ဆမြန်တဲ့ လေယာဉ်ကို လာမယ့် ၃ နှစ်အတွင်း တည်ဆောက်ပေးဖို့ Hermeus ကုမ္ပဏီနဲ့ ဒေါ်လာ သန်း ၆၀ တန် သဘောတူ စာချုပ်ကို ချုပ်ဆိုခဲ့ပါတယ်။
Ref : ladbible
