မြန်မာနိုင်ငံရဲ့ ငလျင်နဲ့ ပတ်သက်တဲ့ သတင်းအချက်အလက်တွေကို တစ်ကမ္ဘာလုံးက စောင့်ကြည့်နေကြပါတယ်။ အဲဒါကို အခွင့်ကောင်းယူပြီး မြန်မာငလျင်နဲ့ ပတ်သက်တဲ့ AI Video အတုတွေကို ဖန်တီး မျှဝေလာကြပါတယ်။
အင်စတာဂရမ်မှ “Myanmar Earthquake 17M People Affected” အမည်ရ ဗီဒီယိုမှာ နောက်ခံမှာ အဆောက်အဦး မီးလောင်နေပြီး ကြီးကြီးမားမား ပျက်ဆီးနေတဲ့ လမ်းတစ်ခုကို ပြသထားပါတယ်။ အဲဒီ ဗီဒီယိုကို ကြည့်ရှုသူ ၁.၇ သန်းကျော်သွားပြီ ဖြစ်ပါတယ်။ ဒါပေမယ့် အဲဒီ ဗီဒီယိုဟာ AI နဲ့ ပြုလုပ်ထားတဲ့ အတုအယောင် ဖြစ်ပါတယ်။
X လူမှုကွန်ရက်မှာလည်း ဘုရားကျောင်းများစွာ ပျက်ဆီးနေတဲ့ ဗီဒီယိုကို Follower ၂.၁ သန်းရှိတဲ့ လူက တင်ထားတာကို တွေ့ရပါတယ်။ ဒါပေမယ့် သေသေချာချာကြည့်ရင် Wan AI Generator ရဲ့ Watermark ကို တွေ့မြင်ရမှာ ဖြစ်ပါတယ်။
တံတား ၂ ခု ပြိုကျနေတဲ့ ဗီဒီယိုတစ်ခုကို Facebook မှာ တင်ထားတာတွေ့ရပါတယ်။ ဒါပေမယ့် သေသေချာချာကြည့်ရင် AI Company တစ်ခု ဖြစ်တဲ့ Runway ရဲ့ Watermark ကို တွေ့မြင်ရမှာ ဖြစ်ပါတယ်။
AI ဟာ လူသားတွေအတွက် အကျိုးများစွာ ပြုနေပေမယ့် အခုလိုမျိုး ဗီဒီယို အတုတွေ ဖန်တီးကာ ဆိုးကျိုးတွေ ဖြစ်စေနိုင်တာကိုလည်း သတိပြုသင့်ပါတယ်။ သတင်းအချက်အလက်တွေဟာ မှန်ကန်သလားဆိုတာ သေသေချာချာ စစ်ဆေးပြီးမှ မျှဝေသင့်ပါတယ်။
Ref: Thethaiger
