Unitree ရဲ့ G1 humanoid စက်ရုပ် လေ့ကျင့်ရေးဗီဒီယိုတစ်ခုဟာ ရယ်စရာကောင်းတဲ့ အလွဲတစ်ခုကြောင့် လူမှုကွန်ရက်မှာ ပျံ့နှံ့သွားခဲ့ပါတယ်။ တရုတ်နိုင်ငံရဲ့ Bilibili ပလက်ဖောင်းမှာ ဒီဇင်ဘာ ၂၅ ရက်က စတင်တင်ခဲ့တဲ့ ဒီကလစ်မှာ နည်းပြတစ်ယောက်က motion-capture ဝတ်စုံကို ဝတ်ဆင်ပြီး G1 စက်ရုပ်ကို ထိန်းချုပ်နေတာကို တွေ့ရပါတယ်။ ဒီနည်းပညာက စက်ရုပ်ကို နည်းပြရဲ့ လှုပ်ရှားမှုတွေအတိုင်း အချိန်နဲ့တစ်ပြေးညီ လိုက်လုပ်စေနိုင်ပြီး ဒါဟာ humanoid စက်ရုပ်တွေကို ရှုပ်ထွေးတဲ့ လှုပ်ရှားမှုတွေ သင်ကြားပေးရာမှာ သုံးလေ့ရှိတဲ့ နည်းလမ်းတစ်ခု ဖြစ်ပါတယ်။
အစပိုင်းမှာတော့ အရာအားလုံး အဆင်ပြေချောမွေ့နေပါတယ်။ နည်းပြက လက်သီးထိုးတာတွေ၊ ခြေကန်တာတွေ လုပ်ပြပြီး G1 ကလည်း ပြဿနာမရှိဘဲ လိုက်လုပ်ပါတယ်။ ဒါပေမဲ့ အပိုင်းတစ်ခုမှာတော့ စက်ရုပ်က လှည့်တဲ့အရှိန်ကို မှားတွက်မိပုံရပြီး နည်းပြရဲ့ ပေါင်ကြားကို တည့်တည့် ကန်ထည့်လိုက်ပါတယ်။
တုံ့ပြန်မှုကတော့ ချက်ချင်းပါပဲ။ နည်းပြက နာကျင်လွန်းလို့ ကိုယ်ကိုကွေးပြီး ဒူးထောက်ကျသွားပါတယ်။ စက္ကန့်ပိုင်းအကြာမှာပဲ စက်ရုပ်ကလည်း အဲဒီပုံစံအတိုင်း လိုက်လုပ်ပြီး သူပါ နာကျင်နေသလိုမျိုး ရှေ့ကို ကိုင်းကျသွားပါတယ်။ ဒီအခိုက်အတန့်ကတော့ လူမှုကွန်ရက် ပလက်ဖောင်းတွေပေါ်မှာ meme တစ်ခု ဖြစ်သွားစေခဲ့ပါတယ်။
ဒီဗီဒီယိုဟာ Bilibili အပြင် နောက်တစ်နေ့မှာ X (ယခင် Twitter) ပေါ်ကိုပါ ရောက်လာပြီး လျင်မြန်စွာ ပြန့်နှံ့သွားပါတယ်။ Tesla Cybertruck အင်ဂျင်နီယာချုပ် Wes Morrill အပါအဝင် လူများစွာက ပြန်လည်မျှဝေခဲ့ကြပြီး Reddit နဲ့ တခြားဖိုရမ်တွေမှာလည်း ရေပန်းစားလာပါတယ်။
ဒီ humanoid စက်ရုပ်ဟာ အရင်က စားပွဲတင်တင်းနစ်ကစားတာ၊ ဘတ်စကက်ဘော ပစ်တာနဲ့ သိုင်းကွက်တွေ ကစားတာတွေကို ပြသခဲ့ဖူးပါတယ်။ ဒါပေမဲ့ ဒီဖြစ်ရပ်ကတော့ အနီးကပ် teleoperation (အဝေးထိန်းစနစ်) ရဲ့ အန္တရာယ်တစ်ခုကို မီးမောင်းထိုးပြနေပါတယ်။ အချိန်ကိုက် လွဲချော်တာ ဒါမှမဟုတ် လှုပ်ရှားမှုကို အမှားဖတ်မိတာမျိုး နည်းနည်းလေး ဖြစ်သွားရင်တောင် မမျှော်လင့်ထားတဲ့ ရလဒ်တွေ ဖြစ်လာနိုင်ပါတယ်။
အလွဲအချော်တွေ ရှိပေမယ့် teleoperation ဟာ humanoid စက်ရုပ်တွေကို လေ့ကျင့်ပေးရာမှာ အရေးပါတဲ့ ကိရိယာတစ်ခုအဖြစ် ဆက်ရှိနေပါတယ်။ အထူးသဖြင့် ကြိုတင် ပရိုဂရမ်ရေးဆွဲဖို့ ရှုပ်ထွေးလွန်းတဲ့ အလုပ်တွေအတွက်ပါ။ ဒါပေမဲ့ ဒီကလစ်ကတော့ အဆင့်မြင့် စက်ရုပ်တွေတောင်မှ အပြစ်အနာအဆာ ကင်းစင်ခြင်း မရှိသေးဘူးဆိုတာကို သတိပေးနေပါတယ်။
လောလောဆယ်မှာတော့ G1 ရဲ့ မတော်တဆ ကန်ချက်နဲ့ လူလို နာကျင်ပြတာကို အချိန်ကိုက် လိုက်လုပ်ပြခဲ့တာက အင်တာနက်အသုံးပြုသူတွေကို ရယ်မောပျော်ရွှင်စေခဲ့ပါတယ်။
Ref : gizmochina
