Microsoft ရဲ့ CEO ဖြစ်တဲ့ Satya Nadella ဟာ ၂၀၂၅ ဘဏ္ဍာနှစ်မှာ ဝင်ငွေ ဒေါ်လာ ၉၆.၅ သန်း ရရှိခဲ့ပြီး၊ ဒါဟာ မနှစ်ကရခဲ့တဲ့ ဒေါ်လာ ၇၉.၁ သန်းထက် ၂၂ ရာခိုင်နှုန်း တိုးတက်လာတာ ဖြစ်ပါတယ်။ အဲဒီ ဝင်ငွေ အစုအဝေးထဲမှာ အဓိကအားဖြင့် စတော့ရှယ်ယာ ဆုကြေး ဒေါ်လာ ၈၄ သန်း ပါဝင်ပြီး၊ ငွေသားဆုကြေး ဒေါ်လာ ၉.၅ သန်းနဲ့ အခြေခံလစာ ဒေါ်လာ ၂.၅ သန်းတို့လည်း ပါဝင်ပါတယ်။ သူ့ရဲ့ ဝင်ငွေ ၉၀ ရာခိုင်နှုန်းဟာ ကုမ္ပဏီရဲ့ စတော့ရှယ်ယာ စွမ်းဆောင်ရည်ပေါ်မှာ တိုက်ရိုက် မူတည်နေပါတယ်။
၂၀၁၄ ခုနှစ်မှာ CEO ဖြစ်လာခဲ့တဲ့ Nadella ဟာ Microsoft ကုမ္ပဏီကို artificial intelligence (AI) နဲ့ cloud computing နယ်ပယ်တွေမှာ ကမ္ဘာ့ထိပ်တန်းခေါင်းဆောင်တစ်ဦး ဖြစ်လာအောင် အသွင်ပြောင်းပေးနိုင်ခဲ့ပါတယ်။ သူ့ရဲ့ ဦးဆောင်မှုအောက်မှာ LinkedIn, GitHub နဲ့ Activision Blizzard တို့လို နာမည်ကြီး ကုမ္ပဏီကြီးတွေကို ဝယ်ယူနိုင်ခဲ့သလို၊ OpenAI နဲ့ ရေရှည် ပူးပေါင်းပြီး Microsoft ရဲ့ ထုတ်ကုန်တွေအားလုံးမှာ AI စနစ်တွေ ထည့်သွင်းလာနိုင်ခဲ့ပါတယ်။
သူ့ရဲ့ ဦးဆောင်မှုကြောင့် Microsoft ရဲ့ စတော့ရှယ်ယာတွေဟာ ၂၀၂၅ ခုနှစ်အတွင်းမှာတင် ၂၃ ရာခိုင်နှုန်း ခုန်တက်သွားခဲ့ပြီး၊ ပြီးခဲ့တဲ့ သုံးနှစ်အတွင်းမှာတော့ စတော့တန်ဖိုးဟာ နှစ်ဆကျော် မြင့်တက်လာခဲ့ပါတယ်။ ကုမ္ပဏီရဲ့ အရောင်းဝင်ငွေဟာ နောက်ဆုံး သုံးလပတ် အစီရင်ခံစာအရ ၁၈ ရာခိုင်နှုန်း တိုးတက်ခဲ့ပြီး၊ ဒါဟာ Azure cloud ဌာနနဲ့ AI နည်းပညာတွေရဲ့ ဝယ်လိုအား ကြီးထွားမှုကြောင့် ဖြစ်ပါတယ်။
Nadella တစ်ယောက်တည်း ဝင်ငွေတိုးတာ မဟုတ်ဘဲ၊ တခြား အမှုဆောင်အရာရှိကြီးတွေလည်း လစာတိုးတာတွေ ရရှိခဲ့ပါတယ်။ ဘဏ္ဍာရေးမှူးချုပ် Amy Hood က ဒေါ်လာ ၂၉.၅ သန်း ရရှိခဲ့ပြီး၊ စီးပွားရေးလုပ်ငန်းပိုင်းဆိုင်ရာ အကြီးအကဲ Judson Althoff က ဒေါ်လာ ၂၈.၂ သန်း ရရှိခဲ့ပါတယ်။ ဒါပေမဲ့ တစ်ဖက်မှာတော့ Microsoft ဟာ ၂၀၂၅ ခုနှစ်အတွင်း ဝန်ထမ်း ၁၅,၀၀၀ ကျော်ကို အလုပ်ဖြုတ်ခဲ့တာလိုမျိုး လုပ်သားအင်အားဆိုင်ရာ စိန်ခေါ်မှုတွေနဲ့ ရင်ဆိုင်ခဲ့ရပါတယ်။ Nadella ကိုယ်တိုင်ကလည်း ဇူလိုင်လတုန်းက ဝန်ထမ်းတွေကို ပေးပို့တဲ့ စာတစ်စောင်မှာ အဲဒီ အလုပ်ဖြုတ်မှုတွေက သူ့အပေါ်မှာ “စိတ်ဖိစီးမှုတွေ အကြီးအကျယ် ဖြစ်စေခဲ့တယ်” လို့ ဝန်ခံ ရေးသားခဲ့ဖူးပါတယ်။
Ref : ndtv
