Tesla China က လျှပ်စစ်ကား နည်းပညာတွေ ခိုးယူမှုကြောင့် တရုတ် ကုမ္ပဏီ Bingling Intelligent Technology ကို တရားစွဲလိုက်ပါတယ်။ အဲဒီ တရုတ် ကုမ္ပဏီကို Xiaomi က ပိုင်ဆိုင်တာကြောင့် Tesla နဲ့ Xiaomi တို့ ထိပ်တိုက်တွေ့ကြတော့မှာပါ။
Tesla က Shanghai Intellectual Property Court မှာ တရားစွဲထားတာ ဖြစ်ပြီး အောက်တိုဘာလ ၁၀ ရက်နေ့မှာ အမှုကို စတင် စစ်ဆေးမှာပါ။ Bingling Intelligent Technology ဟာ Changzhou အခြေစိုက် ကားအစိတ်အပိုင်းနဲ့ Chip ဒီဇိုင်း ထုတ်လုပ်သူ ဖြစ်ပြီး အများစုကို Xiaomi က ပိုင်ဆိုင်တာပါ။
Tesla က Bingling Intelligent Technology ဟာ ကား ဆန်ဆာနဲ့ အစိတ်အပိုင်းတွေ ထုတ်လုပ်မှုနဲ့ ပတ်သက်တဲ့ နည်းပညာတွေကို ခိုးယူထားတယ်လို့ စွပ်စွဲထားပါတယ်။
Tesla က နစ်နာကြေး တောင်းဆိုထားပြီး ကုမ္ပဏီရဲ့ နည်းပညာတွေကို အသုံးမပြုဖို့ သတိပေးထားပါတယ်။ Xiaomi ဟာ လျှပ်စစ်ကား ထုတ်လုပ်နေတဲ့အတွက် Tesla ရဲ့ နည်းပညာတွေဟာ Xiaomi ရဲ့ ကားမှာ ပါသလားဆိုတာ မေးစရာ ဖြစ်လာပါတယ်။
ဒါပေမယ့် တရားရုံးက မစစ်ဆေးသေးတဲ့အတွက် Xiaomi ဟာ အပြစ်မရှိသေးဘူးလို့ လက်ရှိမှာ ကောက်ချက်ချနိုင်ပါတယ်။ Tesla ဟာ ၂၀၁၉ ခုနှစ်တုန်းကလည်း ကုန်သွယ်မှု လျှို့ဝှက်ချက်တွေ ခိုးယူတဲ့အတွက် တရုတ် လျှပ်စစ်ကား ကုမ္ပဏီ Xpeng Motors ကို တရားစွဲခဲ့ပါသေးတယ်။
အဲဒီအမှုကို ၂၀၂၀ ခုနှစ်မှာ ဖြေရှင်းပေးခဲ့ပြီး Xpeng က Tesla ကို လျော်ကြေးပေးခဲ့ရပါတယ်။ Bingling Intelligent Technology ရဲ့ အမှုဟာလည်း ဒီလို ဖြစ်လာမလားဆိုတာ စောင့်ကြည့်ရမှာပါ။
Ref: gizmochina
