အမေရိကန် semiconductor ကုမ္ပဏီကြီးဖြစ်တဲ့ Nvidia ရဲ့ တရုတ်မှာရှိတဲ့ အဆင့်မြင့် chip ဈေးကွက်ကို စိုးမိုးထားနိုင်မှု ပျောက်ကွယ်သွားပြီလို့ CEO Jensen Huang က ပြောပါတယ်။ တင်းကျပ်တဲ့ အမေရိကန်ရဲ့ ပို့ကုန်ထိန်းချုပ်မှုတွေကြောင့် သူတို့ရဲ့ ဈေးကွက်ဝေစု ၉၅% ကနေ သုည အထိ ကျဆင်းသွားခဲ့တာ ဖြစ်ပါတယ်။
ဒီလအစောပိုင်းက နယူးယောက် မှာပြုလုပ်တဲ့ Citadel Securities ပွဲတစ်ခုမှာ Huang က အခုလို ပြောကြားခဲ့ပါတယ်။ Nvidia အနေနဲ့ A100၊ H100 နဲ့ H200 မော်ဒယ်တွေ အပါအဝင် သူ့ရဲ့ စွမ်းဆောင်ရည်မြင့် AI chip တွေကို တရုတ်ကုမ္ပဏီတွေကို ရောင်းချခွင့် လုံးဝ ပိတ်ပင်ခံထားရတာဖြစ်ပြီး အဲဒီ ကန့်သတ်ချက်တွေဟာ ၂၀၂၂ မှာ စတင်ခဲ့တာလို့ သူက ထုတ်ဖော်ပြောကြားခဲ့ပါတယ်။
Nvidia ကို တရုတ်ကနေ ဖယ်ထုတ်လိုက်တာဟာ ကုမ္ပဏီကို ထိခိုက်စေရုံသာမက တရုတ်နဲ့ အမေရိကန် နှစ်နိုင်ငံလုံးအတွက် ပိုဆိုးတဲ့ သက်ရောက်မှုတွေ ရှိတယ်လို့ သူက အလေးပေး ပြောကြားခဲ့ပါတယ်။ တရုတ် ကို ထိခိုက်စေတဲ့အရာက အမေရိကန် ကိုလည်း မကြာခဏ ထိခိုက်စေနိုင်ပြီး ပိုတောင် ဆိုးပါတယ် လို့ Huang က ပြောပါတယ်။ ကမ္ဘာ့ AI သုတေသီတွေရဲ့ ၅၀% ခန့်ရှိနေတဲ့ တရုတ်ရဲ့ ကမ္ဘာလုံးဆိုင်ရာ AI ဖွံ့ဖြိုးတိုးတက်မှုမှာ အရေးပါတဲ့ အခန်းကဏ္ဍကိုလည်း သူက ဆက်လက် မီးမောင်းထိုးပြခဲ့ပါတယ်။
Nvidia CEO ရဲ့ မှတ်ချက်တွေဟာ တရုတ်နိုင်ငံက semiconductor မှာ ကိုယ်တိုင် ရပ်တည်နိုင်ရေးအတွက် တစ်နိုင်ငံလုံးအတိုင်းအတာနဲ့ တွန်းအားပေး လုပ်ဆောင်နေတဲ့ အချိန်နဲ့ တိုက်ဆိုင်နေပါတယ်။
တရုတ်ရဲ့ AI နဲ့ semiconductor ပြိုင်ဘက်တွေက ပြည်တွင်းထုတ် အစားထိုးပစ္စည်းတွေကို အလျင်အမြန် မိတ်ဆက်လာကြပြီး Nvidia ရဲ့ တစ်ချိန်က စိုးမိုးထားတဲ့ ဈေးကွက်ဝေစုကို တိုက်စားလာပါတယ်။ Nvidia ရဲ့ နည်းပညာကို ကျော်လွှားဖို့ clustering နည်းလမ်းတွေနဲ့ နောက်ဆုံးပေါ် ထုတ်လုပ်မှု နည်းပညာတွေကို Huawei က လုပ်ဆောင်နေပါတယ်။ Huawei ဟာ NVIDIA ကို အားမကိုးဘဲ တရုတ်နိုင်ငံရဲ့ semiconductor မှာ ကိုယ်တိုင်ရပ်တည်နိုင်ရေးအတွက် ပြင်းပြင်းထန်ထန် ကြိုးစားနေပါတယ်။
Ref : Times of India
