Huawei ဟာ ဒီနှစ်မေလမှာ True Wireless နားကြပ် ဖြစ်တဲ့ FreeBuds 3i နားကြပ်ကို ကြေညာခဲ့ပြီး နာမည်အတိုင်းပဲ တတိယမျိုးဆက် TWS နားကြပ် ဖြစ်တဲ့ FreeBuds 3 ရဲ့ မော်ဒယ်ခွဲ ၁ ခု ဖြစ်ပါတယ်။ အဲဒီအချိန်တုန်းက Huawei ဟာ အစောပိုင်းမှာ အဖြူရောင်ကို ရောင်းပေးပြီး ဇွန်လကျမှ အနက်ရောင်ကို ရောင်းမယ်လို့ ပြောခဲ့ပါတယ်။ ဒါပေမယ့် အနက်ရောင် မထွက်လာခဲ့ဘဲ အဖြူရောင်ပဲ ရောင်းပေးခဲ့ပါတယ်။
အခုထွက်လာတဲ့ သတင်းအရ Huawei ဟာ တရုတ်မှာ FreeBuds 3i အနက်ရောင်ကို မကြာခင် ရောင်းချပေးတော့မယ်လို့ သိရပါတယ်။ ၉၉၉ ယွမ်နဲ့ ရောင်းချနိုင်ပြီး မြန်မာငွေ ၂ သိန်းလောက် ကျသင့်နိုင်တဲ့အတွက် ဈေးကတော့ မသေးပါဘူး။
အဲဒီ နားကြပ်မှာ အရွယ်ကြီး 10mm Dynamic Drivers နဲ့ Active Noise Cancellation စွမ်းရည်အတွက် မိုက်ကရိုဖုန်းများစွာ ထည့်သွင်းထားပါတယ်။ ဖုန်းလက်ခံတာ၊ ဖုန်းချတာ၊ သီချင်း ရပ်တာ၊ ဖွင့်တာလို အလုပ်တွေအတွက် Touch Gesture တွေပါလာပြီး Huawei က နားကြပ်ဟာ သဘာဝကျတဲ့ အသံနဲ့ စွမ်းရည်မြင့် ဘေ့စ် အသံတွေ ထုတ်လုပ်ပေးနိုင်တယ်လို့ ပြောပါတယ်။
Charging Case ကနေ ထုတ်လိုက်တာနဲ့ နားကြပ်ကို ဖုန်းနဲ့ အလိုလို ချိတ်ဆက်ပေးနိုင်ပြီး Huawei က ၁ ခါအားသွင်းထားရင် ၃ နာရီခွဲကြာ သီချင်းနားထောင်နိုင်တယ်လို့ ပြောပါတယ်။ Charging Case က ဘက်ထရီက ၁၄ နာရီခွဲလောက် ပိုအသုံးခံစေပါတယ်။
Ref : gizmochina
