သမ္မတ ဒေါ်နယ်ထရန့်နဲ့ ဘီလီယံနာ အီလွန်မက်စ်တို့ရဲ့ ပဋိပက္ခဟာ အင်္ဂါနေ့မှာ ပြန်လည်အရှိန်မြင့်လာခဲ့ပြီး၊ ထရန့်က မက်စ်ကို ပြည်နှင်ဒဏ်ပေးဖို့ “စဉ်းစားကြည့်ရမယ်” လို့ သတင်းထောက်တွေကို ပြောကြားလိုက်ပါတယ်။ ဒီဖြစ်ရပ်ဟာ သူတို့နှစ်ဦးကြားက ခဏတာ အဆင်ပြေနေခဲ့တဲ့ ဆက်ဆံရေးကို အဆုံးသတ်သွားစေခဲ့ပါတယ်။
ပဋိပက္ခ ဘယ်လိုပြန်စသလဲ
ဇာတ်လမ်းကတော့ မက်စ်က ထရန့်ရဲ့ အသုံးစရိတ်ဥပဒေကြမ်းကို အမေရိကန်ရဲ့ကြွေးမြီကို ဒေါ်လာ ၅ ထရီလီယံအထိ တိုးစေမယ့် “ရူးသွပ်တဲ့ဥပဒေ” လို့ ပြင်းပြင်းထန်ထန် ဝေဖန်ခဲ့တာကနေ စပါတယ်။ သူက လက်ရှိစနစ်ကို “ဝက်မတရားစားပါတီ (PORKY PIG PARTY!!)” လို့တောင် သုံးနှုန်းခဲ့ပါတယ်။
ထရန့်ကလည်း ချက်ချင်းတုံ့ပြန်ခဲ့ပြီး မက်စ်ဟာ ဥပဒေကြမ်းထဲမှာ လျှပ်စစ်ကား (EV) ထုတ်လုပ်မှုကို မဖြစ်မနေလုပ်ရမယ်ဆိုတဲ့ မူဝါဒကို ဖြုတ်ချလိုက်လို့ ဒေါသထွက်နေတာပါလို့ ဆိုပါတယ်။ ဒါ့အပြင် ထရန့်က “ကျုပ်တို့ ဒါကို စဉ်းစားကြည့်ရလိမ့်မယ်” လို့ ပြည်နှင်ဒဏ်ပေးမယ့်အကြောင်း အရိပ်အမြွက်ပြောခဲ့ပြီး၊ မက်စ်အရင်က ဦးဆောင်ခဲ့တဲ့ အစိုးရထိရောက်မှုဌာန (DOGE) ကိုသုံးပြီး မက်စ်ကို စစ်ဆေးရမယ်လို့တောင် ခြိမ်းခြောက်ခဲ့ပါတယ်။
မက်စ်ရဲ့ တုံ့ပြန်မှု
ထရန့်ရဲ့ ပြည်နှင်ဒဏ်ပေးမယ့် မှတ်ချက်အပေါ်မှာ မက်စ်က “ဒီကိစ္စကို ပိုဆိုးသွားအောင်လုပ်ဖို့ အရမ်း စိတ်ဝင်စားပါတယ်။ အရမ်းပါပဲ။ ဒါပေမဲ့ လောလောဆယ်တော့ သည်းခံထားလိုက်ဦးမယ်” လို့ သူ့ရဲ့ X အကောင့်မှာ ရေးသားခဲ့ပါတယ်။
သူတို့နှစ်ယောက်ရဲ့ နောက်ခံသမိုင်း
သူတို့နှစ်ယောက်ရဲ့ ပဋိပက္ခဟာ အခုမှစတာမဟုတ်ပါဘူး။ ပြီးခဲ့တဲ့ ဇွန်လအစောပိုင်းကလည်း ဒီဥပဒေကြမ်းနဲ့ပတ်သက်ပြီး ပြဿနာဖြစ်ခဲ့ကြပါသေးတယ်။ အဲဒီတုန်းက မက်စ်က “ကျွန်တော်မရှိရင် ထရန့် ရွေးကောက်ပွဲနိုင်မှာမဟုတ်ဘူး” လို့ ပြောခဲ့သလို၊ ထရန့်ကလည်း မက်စ်ရဲ့ အစိုးရကန်ထရိုက်တွေကို ဖြတ်တောက်ပစ်မယ်လို့ ခြိမ်းခြောက်ခဲ့ပါတယ်။
ဒါပေမဲ့ ဇွန်လ ၁၁ ရက်နေ့မှာတော့ ထရန့်နဲ့ ဖုန်းပြောပြီးနောက်မှာ မက်စ်က သူ့ရဲ့ ပို့စ်တွေ “နည်းနည်းလွန်သွားတယ်” ဆိုပြီး လူသိရှင်ကြား တောင်းပန်ခဲ့တာကြောင့် ပြဿနာ ခဏငြိမ်သက်သွားခဲ့ပါတယ်။
အခုတစ်ကြိမ်မှာတော့ ပြဿနာက ပြန်လည်ကြီးထွားလာခဲ့ပြီး သူတို့နှစ်ဦးရဲ့ မတည်ငြိမ်တဲ့ဆက်ဆံရေးရဲ့ အနာဂတ်ကို မရေမရာဖြစ်စေပါတယ်။ ဒါပေမဲ့ ဥပဒေပညာရှင်တွေကတော့ အမေရိကန်နိုင်ငံသားဖြစ်တဲ့ မက်စ်ကို ပြည်နှင်ဒဏ်ပေးဖို့ဆိုတာ လက်တွေ့မှာ မဖြစ်နိုင်ဘူးလို့ ထောက်ပြထားကြပါတယ်။
Ref: abc news
