စဉ်းစားကြည့်လိုက်ပါ… သင်ဟာ တိဘက်ကုန်းမြင့်ပေါ်က လာဆာမြို့မှာ ရှိနေပြီး သင့်ရဲ့လက်ချောင်းတွေရဲ့ လှုပ်ရှားမှုအတိုင်း မိုင်ပေါင်း ၃,၁၀၀ ကျော် (ကီလိုမီတာ ၅,၀၀၀ နီးပါး) အကွာ ပေကျင်းမြို့က ဆေးရုံတစ်ခုမှာ စက်ရုပ်လက်တံတွေက လူတစ်ယောက်ရဲ့ အသည်းကို တိတိကျကျ ခွဲစိတ်ကုသပေးနေတာကို…။
ဒါဟာ သိပ္ပံစိတ်ကူးယဉ်ဇာတ်လမ်းတစ်ပုဒ် မဟုတ်တော့ပါဘူး။ တကယ်ဖြစ်ပျက်ခဲ့တဲ့ ကမ္ဘာ့ပထမဆုံးသော ဆေးဘက်ဆိုင်ရာ အောင်မြင်မှုတစ်ခု ဖြစ်လာခဲ့ပါပြီ။
ဒီမဖြစ်နိုင်ဘူးထင်ရတဲ့ ခွဲစိတ်မှုကို တရုတ်ဆရာဝန်ကြီး ပါမောက္ခ Rong Liu ဦးဆောင်တဲ့အဖွဲ့က အောင်မြင်စွာ ပြုလုပ်ပြခဲ့တာပါ။ သူတို့ရဲ့ အကြီးမားဆုံးရန်သူကတော့ အလင်းအလျင်နီးပါးနဲ့ သွားနေတဲ့ ဂြိုလ်တုဆက်သွယ်ရေးမှာတောင် ဖြစ်ပေါ်တတ်တဲ့ “အချိန်နောက်ကျမှု (Signal Delay)” ပါပဲ။
ခွဲစိတ်ဆရာဝန်ရဲ့ လှုပ်ရှားမှုနဲ့ စက်ရုပ်ရဲ့ တုံ့ပြန်မှုကြားမှာ ၆၃၂ မီလီစက္ကန့် (တစ်စက္ကန့်ရဲ့ တစ်ဝက်ကျော်) ခြားနားနေခဲ့ပေမယ့် အံ့ဩစရာကောင်းလောက်အောင် တိကျတဲ့ နည်းပညာတွေသုံးပြီး အဲဒီအခက်အခဲကို ကျော်လွှားနိုင်ခဲ့ပါတယ်။ ခွဲစိတ်မှုအတွင်း စက်ရုပ်လက်တံရဲ့ တိကျမှုဟာ ၀.၃၂ မီလီမီတာ သာ လွဲချော်ခဲ့ပြီး၊ ဒါဟာ လူ့ဆံပင်မျှင်တစ်ချောင်းရဲ့ အထူလောက်ပဲ ရှိပါတယ်။
Apstar-6D ဂြိုလ်တုကို အသုံးပြုပြီး လာဆာမြို့ကနေ ပေကျင်းမြို့က လူနာနှစ်ဦးကို တစ်ပြိုင်နက် ခွဲစိတ်ခဲ့တာပါ။ နှစ်ယောက်စလုံးဟာ သွေးထွက်နည်းနည်းနဲ့ ဘာနောက်ဆက်တွဲပြဿနာမှမရှိဘဲ ခွဲစိတ်မှုကို အောင်မြင်စွာ ပြီးမြောက်ခဲ့ပါတယ်။
ဒီအောင်မြင်မှုဟာ ဆေးပညာရဲ့ နယ်နိမိတ်ကို ချဲ့ထွင်လိုက်တာ တင်မကပါဘူး။ ဆေးရုံနဲ့အလှမ်းဝေးတဲ့ တောတောင်တွေ၊ ကျွန်းတွေပေါ်က လူတွေအတွက် အရေးပေါ်အသက်ကယ်တင်ဖို့ မျှော်လင့်ချက်အလင်းရောင်တစ်ခုကိုပါ ယူဆောင်လာပေးလိုက်တာ ဖြစ်ပါတယ်။
သုတေသနအဖွဲ့ရဲ့ အဆိုအရ သူတို့ရဲ့နောက်ဆုံးပန်းတိုင်ဟာ မိုင်ပေါင်း ၉၃,၀၀၀ (ကီလိုမီတာ ၁၅၀,၀၀၀) အကွာအဝေးအထိ ခွဲစိတ်နိုင်ဖို့ဖြစ်ပြီး၊ ဒါဟာ ကမ္ဘာကနေ လကမ္ဘာဆီ အသွားလမ်းတစ်ဝက်လောက်အထိကနေ ခွဲစိတ်ကုသပေးနိုင်မယ့် အနာဂတ်ကို ညွှန်ပြနေပါတယ်။
Ref: Tech Explorers
