5G ကွန်ရက် Signal တွေဟာ လူသားတွေကို အန္တရာယ် ဖြစ်စေတယ်ဆိုတဲ့ အယူအဆတွေ ဖြစ်ပေါ်လာတဲ့အတွက် အဲဒီ ကွန်ရက်ရဲ့ အန္တရာယ်ကို ကာကွယ်ပေးတဲ့ ထုတ်ကုန်တွေကို ဖန်တီးရောင်းချလာကြပါတယ်။ အခုတော့ Dutch Authority for Nuclear Safety and Radiation Protection (ANVS) က ရေဒီယို သတ္တိကြွမှု ဖြစ်ပေါ်တဲ့ အဲဒီ ထုတ်ကုန် ၁၀ ခုကို ကြေညာလိုက်ပါတယ်။ အဲဒါတွေကို ရေရှည် သုံးရင် အန္တရာယ် ဖြစ်စေတဲ့အတွက် အသုံးမပြုဖို့လည်း အာဏာပိုင်တွေက သတိပေးလိုက်ပါတယ်။
5G ကွန်ရက်တွေဟာ လူတွေကို အန္တရာယ် ဖြစ်စေတယ်ဆိုတဲ့ သက်သေ အထောက်အထားတွေ မတွေ့ရသေးပါဘူး။ ကမ္ဘာ့ကျန်းမာရေး အဖွဲ့အစည်းက 5G မိုဘိုင်း ကွန်ရက်တွေဟာ ဘေးကင်း စိတ်ချရပြီး လက်ရှိ 3G ၊ 4G Signal တွေနဲ့ အခြေခံအားဖြင့် မကွာခြားဘူးလို့ ပြောထားပါတယ်။
အဲဒီ မိုဘိုင်း ကွန်ရက်တွေဟာ DNA ကို မထိခိုက်စေတဲ့ Non-ionising Radio လှိုင်းတွေကို အသုံးပြုပါတယ်။ ဒါပေမယ့်လည်း အဲဒါတွေဟာ လူတွေကို အန္တရာယ် ဖြစ်စေတယ်လို့ ယုံကြည်ထားကြသူတွေဟာ Transmitter တွေကို ဖျက်ဆီးတဲ့ ဖြစ်ရပ်တွေလည်း ရှိပါတယ်။
5G ကွန်ရက်ရဲ့ အန္တရာယ်ကို ကာကွယ်ဖို့အတွက် Sleeping Mask ၊ လည်ဆွဲနဲ့ လက်ကောက်တွေလို ထုတ်ကုန်တွေကို ရောင်းချနေကြပါတယ်။ Magnetix Wellness ရဲ့ ကလေးတွေအတွက် လက်ကောက်ဟာလည်း ရေဒီယို သတ္တိကြွတာကို စစ်ဆေးတွေ့ရှိခဲ့ကြပြီး ANVS က အဲဒီ ထုတ်ကုန်ကို အသုံးမပြုဖို့ သတိပေးထားပါတယ်။ ANVS က ရေဒီယို သတ္တိကြွတဲ့ ထုတ်ကုန် စာရင်း အပြည့်အစုံကို Website မှာ ဖော်ပြထားပါတယ်။
Ref : bbc
