Apple ရဲ့ iPhone 15 အသစ်တွေဟာ အရင်မျိုးဆက်ထက် တရုတ်မှာ ရောင်းအား ကျဆင်းနေတယ်လို့ ဈေးကွက် သုတေသနစစ်တမ်းက ဖော်ပြထားပါတယ်။ တရုတ်မှာ ပြိုင်ဖက် Huawei ရှိနေတာကြောင့်လည်း iPhone 15 ရောင်းအား နည်းနေတာပါ။
iPhone 15 Series ဟာ စတင် ရောင်းချအပြီး ၁၇ ရက်အတွင်း iPhone 14 ထက် ရောင်းအား ၄.၅ ရာခိုင်နှုန်း ကျဆင်းတယ်လို့ ဈေးကွက်သုတေသန အဖွဲ့အစည်း Counterpoint Research က ပြောပါတယ်။ Huawei Mate 60 Pro ဟာ iPhone 15 ထက် ရောင်းအား ပိုကောင်းနေပါတယ်။
Apple ဟာ ဆယ်စုနှစ် ၁ ခုအတွင်း စမတ်ဖုန်း ရောင်းအား အနည်းဆုံး ဖြစ်နေပြီး iPhone 15 တွေ အပူလွန်ကဲတဲ့ ပြဿနာဟာလည်း အကြောင်းအရင်း ၁ ခု ဖြစ်နိုင်ပါတယ်။ Apple ဟာ တရုတ်မှာ ၂၀၁၈ ခုနှစ်နောက်ပိုင်း စမတ်ဖုန်း ရောင်းအား အနည်းဆုံး ဖြစ်နေပါတယ်။ တရုတ် ကုမ္ပဏီတွေ ဖြစ်တဲ့ OPPO နဲ့ vivo တို့က အာရှက User တွေကို စွဲဆောင်ထားနိုင်ပါတယ်။
Counterpoint က တရုတ်မှာ iPhone ရောင်းအားကျဆင်းတာဟာ ကိုဗစ် ၁၉ ကပ်ရောဂါကြောင့်လို့ သုံးသပ်ပါတယ်။ အမေရိကန်မှာတော့ iPhone 15 ဟာ စတင် ရောင်းချအပြီး ၉ ရက်အတွင်း iPhone 14 ထက် ရောင်းအား ပိုများနေပါတယ်။
တရုတ်မှာ အစိုးရဌာနတွေနဲ့ နိုင်ငံပိုင် ကုမ္ပဏီတွေမှာ iPhone အသုံးပြုတာကို ပိတ်ပင်ထားတာကြောင့်လည်း iPhone ရောင်းအား ကျဆင်းနေတာ ဖြစ်နိုင်ပါတယ်။
Ref : yahoo
