သင်သုံးနေတဲ့ အင်တာနက်ကနေ Netflix ပေါ်က ရုပ်ရှင်တွေ၊ စီးရီးတွေအားလုံးကို တစ်စက္ကန့်တည်းနဲ့ ဒေါင်းလုဒ်ဆွဲချလိုက်လို့ရရင် ဘယ်လိုနေမလဲ။ ဒါဟာ သိပ္ပံစိတ်ကူးယဉ်ဇာတ်လမ်းမဟုတ်တော့ပါဘူး။ ဂျပန်နိုင်ငံက အင်ဂျင်နီယာတွေက အဲဒီအမြန်နှုန်းကို တကယ်လက်တွေ့လုပ်ပြသွားပါပြီ။
ဂျပန်အမျိုးသား သတင်းအချက်အလက်နဲ့ ဆက်သွယ်ရေးနည်းပညာ (NICT) က ကမ္ဘာ့သမိုင်းတစ်လျှောက် အမြန်ဆုံးဖြစ်တဲ့ 1.02 petabits per second (Pb/s) နှုန်းကို အောင်မြင်စွာ စမ်းသပ်ပြလိုက်တာပါ။ဒီမြန်နှုန်းဟာ သင်နဲ့ကျွန်တော်တို့ရဲ့ အိမ်ကအင်တာနက်ထက် အဆသန်းပေါင်းများစွာ ပိုမြန်ပြီး 8K ရုပ်သံလိုင်းပေါင်း ၁၀ သန်း ကို မျက်စိတစ်မှိတ်အတွင်းမှာ တစ်ပြိုင်နက်တည်း ထုတ်လွှင့်နိုင်ပါတယ်။
ဒီအောင်မြင်မှုရဲ့ နောက်ကွယ်က နည်းပညာက ပိုပြီးတောင် အံ့ဩဖို့ကောင်းပါသေးတယ်။ သူတို့ဟာ လုံးဝအသစ်စက်စက် ကေဘယ်လ်ကြိုးတွေကို သုံးခဲ့တာမဟုတ်ပါဘူး။ လက်ရှိကျွန်တော်တို့ သုံးနေတဲ့ ဖိုင်ဘာကေဘယ်လ်နဲ့ ပုံစံ၊ အရွယ်အစား အတူတူပါပဲ။
ကွာခြားသွားတာကတော့ အထဲမှာပါ။ သာမန်ကေဘယ်လ်က ဒေတာတွေသွားဖို့ ‘တစ်လမ်းသွားလမ်းကြော’ တစ်ခုပဲရှိပေမယ့်၊ ဒီကေဘယ်လ်အသစ်ကတော့ ‘လေးလမ်းသွားအမြန်လမ်းမကြီး’ လိုမျိုး လမ်းကြောင်းလေးခုနဲ့ တည်ဆောက်ထားတာပါ။ ဒီနည်းပညာကြောင့် ဒေတာတွေကို အဆပေါင်းများစွာ ပိုပြီးသယ်ဆောင်သွားနိုင်တာ ဖြစ်ပါတယ်။
တစ်နေ့မှာ 6G ကွန်ရက်တွေ၊ မောင်းသူမဲ့ကားတွေနဲ့ တစ်မြို့လုံးကို ချိတ်ဆက်ထားတဲ့ Internet of Things (IoT) ခေတ်ကို ရောက်လာတဲ့အခါ၊ အခုဂျပန်က စမ်းသပ်လိုက်တဲ့ ဒီအမြန်နှုန်းမျိုးက မရှိမဖြစ်လိုအပ်လာမှာပါ။
ဒီစံချိန်သစ်ဟာ စမ်းသပ်မှုတစ်ခုမဟုတ်ဘဲ၊ ကျွန်တော်တို့အားလုံးရဲ့ ဒစ်ဂျစ်တယ်အနာဂတ်ကို လုံးဝပြောင်းလဲပစ်နိုင်မယ့် ကြီးမားတဲ့ခြေလှမ်းတစ်ရပ်ပဲ ဖြစ်ပါတယ်။
Ref : cnet
