Samsung ဟာ ဒီလထဲမှာ Galaxy S21 Series နဲ့အတူ Galaxy Buds Pro ကိုပါ ကြေညာတော့မယ်လို့ ထင်ပါတယ်။ Samsung က Buds Pro ကြေညာမယ့် နေ့ကို မပြောသေးပေမယ့် အခုတော့ Samsung Canada Website မှာ Galaxy Buds Pro အမည်နဲ့ Support Page ကို လွှင့်တင်လိုက်ပါတယ်။
မော်ဒယ်နံပါတ်က SM-R190 လို့ ဖော်ပြထားပြီး တခြား သတင်းအချက်အလက်တွေကို မဖော်ပြထားသေးပါဘူး။ ဒါပေမယ့် အရင်ပေါက်ကြားခဲ့တဲ့ ဓါတ်ပုံတွေနဲ့ သတင်းတွေအရ TWS နားကြပ်ရဲ့ ဒီဇိုင်းနဲ့ လုပ်ဆောင်ချက်တွေကို သိခဲ့ရပြီးပါပြီ။
Galaxy Buds Pro မှာ Two-way စပီကာ ၁ လုံး၊ နားကြပ် တစ်ဖက်စီမှာ မိုက်ကရိုဖုန်း ၃ လုံးစီ၊ 11mm Woofer ၁ လုံးနဲ့ 6.5mm Tweeter ၁ လုံး ထည့်သွင်းထားမှာပါ။ Noise Cancellaiton နည်းပညာနဲ့ IPX7 စံနှုန်း ရေစိုခံ စွမ်းရည် ပါလာမှာပါ။
ဘက်ထရီ ပမာဏကို မသိရသေးပေမယ့် စုစုပေါင်း ၈ နာရီကြာ သီချင်း နားထောင်နိုင်ပြီး ၄ နာရီခွဲ ဖုန်းပြောနိုင်တယ်လို့ သတင်းထွက်နေပါတယ်။ Charging Case က ဘက်ထရီနဲ့ ပေါင်းလိုက်ရင် နောက်ထပ် ၁၀ နာရီခွဲကြာ သီချင်းနားထောင်နိုင်သလို နာရီ ၂၀ ကြာ ဖုန်းပြောနိုင်မှာပါ။
Galaxy Buds Pro မှာ Ambient Sound, Conversation Mode နဲ့ Spatial Audio တွေ ပါလာမှာ ဖြစ်ပြီး Silver , Violet နဲ့ Black ၃ ရောင် ထုတ်လုပ်ထားမှာပါ။ အမေရိကန်မှာ ၁၉၉ ဒေါ်လာနဲ့ ရောင်းနိုင်တဲ့အတွက် ၂ သိန်း ၆ သောင်းဆိုတော့ ဈေး မသေးပါဘူး။
Ref : gsmarena
