Google Pixel Watch ရဲ့ ဘက်ထရီ အရွယ်အစားကို သိရပြီ

Google Pixel Watch ရဲ့ သတင်းတွေ မကြာခဏ ပေါက်ကြားနေပြီး မေလမှာ ကျင်းပမယ့် Google I/O မှာ အဲဒီ စမတ်နာရီကို ကြေညာနိုင်ပါတယ်။ စားသောက်ဆိုင်မှာ မတော်တဆ မေ့ကျန်ခဲ့တဲ့ နမူနာမော်ဒယ်ကိုလည်း မြင်တွေ့ခဲ့ကြပြီးပါပြီ။

Google Pixel Watch ကို Bluetooth SIG မှာ ဗားရှင်း ၃ မျိုး မှတ်ပုံတင်ထားပြီး အခုတော့ ဘက်ထရီ ပမာဏကို သိလာရပါပြီ။ 300mAh ဘက်ထရီ ထည့်သွင်းထားမယ်လို့ သိရပြီး နှိုင်းယှဉ်ရရင် Galaxy Watch4 မှာ အရွယ်အစား ပိုမို သေးငယ်တဲ့ 247mAh ဘက်ထရီပဲ ထည့်သွင်းထားတာ ဖြစ်ပါတယ်။

စားသောက်ဆိုင်မှာ မေ့ကျန်ခဲ့တဲ့ Pixel Watch ဟာ ၄၀ မီလီမီတာ အရွယ်အစား ဖြစ်ပြီး တခြား အရွယ်အစားတွေလည်း ထွက်လာနိုင်ပါတယ်။ Samsung အပါအဝင် တခြား စမတ်နာရီတွေမှာ အရွယ်အစား ၂ မျိုး ထုတ်လုပ်ပေးထားလေ့ရှိကြပါတယ်။

Google Pixel Watch ရဲ့ ဘက်ထရီ အရွယ်အစားဟာ စမတ်နာရီတွေထဲမှာ မသေးဘူးလို့ ပြောနိုင်ပါတယ်။ ဘက်ထရီ အရွယ်အစားကြီးမားတဲ့အတွက် စမတ်နာရီရဲ့ အထူဟာလည်း ၁၄ မီလီမီတာလောက် ရှိပါတယ်။

Google Pixel Watch မှာ ဆယ်လ်လူလာ ဆက်သွယ်မှု ပါလာမှာ ဖြစ်ပြီး အဲဒါဟာ မတူညီတဲ့ မော်ဒယ် ၃ ခုထဲက ၁ ခု ဖြစ်နိုင်ကာ တန်ဖိုးအကြီးဆုံး မော်ဒယ်လို့ ထင်ရပါတယ်။

Ref : gsmarena