ထုတ်လုပ်မှုစရိတ်က ဒေါ်လာ ၆၇၀ ပဲရှိတဲ့ ဒေါ်လာ ၁၇၉၉ တန် Samsung Galaxy Z Fold4

အခုနောက်ပိုင်းမှာ Android Flagship စမတ်ဖုန်းတွေဟာ ပုံမှန်ထက် Foldable Phone တွေကို ပိုပြီး ဦးစားပေးထုတ်လုပ်လာကြပါတယ်။ အခုလိုမျိုး Foldable Phone တွေ ခေတ်စားလာတယ်ဆိုပေမယ့် စျေးနှုန်းအနေနဲ့ တခြားပုံမှန် Flagship ဖုန်းတွေထက် ပိုများနေပါသေးတယ်။

အထူးသဖြင့် Foldable Phone တွေထဲမှာ အအောင်မြင်ဆုံးလို့ ပြောနိုင်တဲ့ Samsung Galaxy Z Fold4 ဖုန်းဆိုရင် စျေးနှုန်းက $1,799 နဲ့ ရောင်းချနေတာဖြစ်ပါတယ်။ ဒါကြောင့် ပုံမှန် Flagship ဖုန်းတွေထက် ၂ ဆနီးပါး စျေးပိုများနေပါတယ်။

ဒါပေမယ့် အခုထွက်ရှိလာတဲ့သတင်းအရ Samsung Galaxy Z Fold4 5G ဖုန်းရဲ့ ထုတ်လုပ်မှုကုန်ကျစရိတ်ဟာ ဒေါ်လာ ၆၇၀ ပဲရှိတယ်လို့ သိရပါတယ်။ အဆိုပါ သတင်းကို Fomalhaust Techno Solution ကနေ Teardown ပြုလုပ်ပြီး ဖော်ပြခဲ့တာဖြစ်ပါတယ်။

ဒါကြောင့် Samsung Galaxy Z Fold4 5G ဖုန်းရဲ့ ထုတ်လုပ်မှုစရိတ်ဟာ ရောင်းစျေးရဲ့ ၄၀ ရာခိုင်နှုန်းပဲရှိပြီး Samsung အနေနဲ့ ဒေါ်လာ ၁,၀၀၀ ကျော် စျေးတင်ရောင်းချနေတာဖြစ်ပါတယ်။ တစ်ခုရှိတာကတော့ ထုတ်လုပ်မှုစရိတ်ထဲမှာ စျေးကွက်အတွင်း ကြော်ငြာမှုတွေ၊ တခြားသောကုန်ကျစရိတ်တွေပါဝင်ခြင်းမရှိတာကြောင့် တကယ်တမ်းအမြတ်ငွေက ဘယ်လောက်ရှိမလဲဆိုတာကိုတော့ တွက်ချက်နိုင်မှာမဟုတ်ပါဘူး။